"Bilirəm ki, bu ayrılıq qiyamətə qədər çəkəcək" - Şəhidin anasından ürəkdağlayan paylaşım - FOTO-VİDEO

Bu gün şəhid leytenant Tural Yadulla oğlu Eyyubovun şəhadətindən bir il ötür.

Sonxeber.az-ın məlumatına görə, 44 günlük Vətən müharibəsində şəhid olan Azərbaycan Ordusunun leytenantı Tural Eyyubov 27 sentyabr 2020-ci il tarixində başlayan müharibədə Füzulinin və Xocavəndin azadlığı uğrunda gedən döyüşlərdə savaşıb.

Ata olmağa hazırlaşan Tural oktyabrın 25-də Füzuli döyüşləri zamanı şəhid olub. O, Kürdəmir rayonunda dəfn olunub.

Hərbi hissə qarşısına qoyulan tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən, ölümündən sonra "Vətən uğrunda" medalı ilə, bundan əlavə, "Xocavəndin azad olunmasına görə", "Füzulinin azad olunmasına görə", "Şuşanın azad olunmasına görə" medalları ilə təltif edilib.

Qeyd edək ki, şəhidimiz ailəli olub və şəhadətindən sonra Məryəm adlı qız övladı dünyaya gəlib. 2019-cu ildə öz toyunda Azərbaycan bayrağına bürünən Tural sanki şəhadətinə bir işarə verib.

İldönümü ilə bağlı bu gün Kürdəmirin Mollakənd kəndində şəhidin anım mərasimi keçirilib.

Şəhid leytenantın ildönümü ilə bağlı anası Gülnar xanımın paylaşımı ürək dağlayıb:

"Bu gün zəng vurdun, dedin ki, 4 gün mənə zəng çatmayacaq. 4 gün oldu, 1 il. Hələ də zəngini gözləyirik, ay Tural. Amma bilirəm ki, bu ayrılıq Qiyamətə qədər çəkəcək. Şəhadətin mübarək, cənnət qoxulum".

Aysel Səfərzadə

Telegramda izləyin

instagramda izləyin