"Lüksemburq Avropa Şurasından istədiyini Ermənistana qarşı tələb etməlidir" - Deputatdan AÇIQLAMA

Ərazisinə görə 167, əhalisinə görə isə 164-cü yerdə olan balaca Lüksemburq Ermənistana dəstək vermək qərarına gəlib. Qətnamə qəbul edərək, Azərbaycanda saxlanılan erməni əsirlərin Ermənistana qaytarılmadığı müddətdə Avropa Birliyini Azərbaycanla əməkdaşlığı genişləndirməməyə çağırıb.

Məsələ ilə bağlı Sonxeber.az-a deputat Ceyhun Məmmədov açıqlama verib.

O bildirib ki, bu, birinci hal deyil:

"Lüksemburq Vətən müharibəsində qələbədən sonra da buna bənzər addımlar atmışdı. Bir sıra Avropa ölkələri, o cümlədən Lüksemburq, dəfələrlə belə addım atıb. Hesab edirəm ki, bu, erməni diasporunun atdığı addımların nəticəsidir. Təəssüf ki, bu gün Qərbin bir sıra ölkələri və dairələri hələ də erməni diasporunun təsiri altındadır.

Bu gün Lüksemburq özü də kiçik bir araşdırma aparsa, görər ki, işğalçı olan məhz Ermənistandır. Lüksemburq Avropa Şurasından istədiyini Azərbaycana qarşı yox, 30 il əleyhimizə ədalatsiz siyasət yürüdən Ermənistana qarşı tələb etməlidir.

Təəssüflər olsun ki, biz bunu görmürük. Biz Lüksemburqun nümunəsində növbəti dəfə ikili standartların, eləcə də ədalətsizliyin parlaq təzahürünü görmüş oluruq. Bu, birmənalı olaraq qəbuledilməzdir. Azərbaycan dəfələrlə məsələyə öz mövqeyini bildirib və yenə bildirəcək.

Bu kimi hallara Ermənistan artıq son qoymalıdır. Onun diasporu da dünyada içtimai rəyi çaştırmağa çalışmamalıdır. Bu, kökündən yanlış olan bir yanaşmadır və elə özlərini uçuruma aparacaq.

Belə halların zaman-zaman olacağını nəzərə almalıyıq və onlara diplomatik yolla reaksiya verməliyik".

ZAİRA AKİFQIZI

Telegramda izləyin