Azərbaycan əhalisi pullarını ən çox hara xərcləyir? - VİDEO

Azərbaycanda insanların daha çox ərzaq məhsullarının alınmasına vəsait xərclədikləri məlum olub. Statistik məlumatlara görə bu istiqamətdə xərclənən vəsaitin 49 faizi ərzaq məhsullarının payına düşür. Kommunal xidmətlərdən istifadəyə, eləcə də toxuculuq məhsulları, geyim və ayaqqabıların alınmasına görə də xeyli pul sərf edilib.

Sonxeber.az-ın "Xəzər Xəbər"ə istinadən məlumatına görə, cari ilin yanvar-oktyabr aylarında pərakəndə ticarət şəbəkəsində istehlakçılara 18,6 milyard manatlıq ərzaq məhsulları, içkilər və tütün məmulatları satılıb.

Vətəndaşlar arasında apardığımız sorğudan da məlum olub ki, insanlar gəlirlərinin böyük hissəsini ərzaq məhsullarına və kommunal xidmətlərə xərcləyirlər. Statistik məlumatlar da bu tendensiyanı təsdiq edir. Cari ilin yanvar-oktyabr aylarında alıcıların son istehlak məqsədilə aldıqları mallara xərclədiyi vəsaitin 49 faizi ərzaq məhsullarının payına düşür. Əksər insanlar büdcələrinə qənaət edə bilmədiklərini deyirlər.

Statistik məlumatlara əsasən insanların vəsaitinin 15,4 faizi toxuculuq məhsulları, geyim və ayaqqabıların, 6 faizi avtomobil benzini və dizel yanacağının, 5,4 faizi elektrik malları və mebellərin, 5 faizi içki və tütün məmulatlarının, 2,2 faizi əczaçılıq məhsulları və tibbi ləvazimatların, 0,9 faizi kompüterlər, telekommunikasiya avadanlıqları və çap məhsullarının, 16,1 faizi isə digər qeyri-ərzaq mallarının alınmasına sərf olunub.

Ümumilikdə, 2021-ci ilin 9 ayı ərzində pərakəndə ticarət şəbəkəsində istehlakçılara 34,4 milyard manatlıq, o cümlədən 18,6 milyard manatlıq ərzaq məhsulları, içkilər və tütün məmulatları, 15,8 milyard manatlıq qeyri-ərzaq malları satılıb.

Telegramda izləyin

instagramda izləyin