Dünyanı qorxuya salan yeni mutasiya "Omikron" barədə mütəxəssisdən AÇIQLAMA

Son günlər koronavirusun yeni ştammı qorxu yaratmağa başlayıb. "Omikron" adlanan bu yeni mutasiyanın yoluxuculuq riskinin daha yüksək olduğu bildirilir. Eyni zamanda, koronavirus peyvəndini hazırlayan "Moderna" şirkətinin baş həkimi Dr. Pol Barton yeni mutasiyanın peyvənddən yayına biləcəyindən şübhələndiyini söyləyib və qeyd edib ki, bu, çox narahatedici bir virusdur.

"Omikron" adlanan bu mutasiya ilə bağlı Sonxeber.az-a infeksionist Nicat Əzimli münasibət bildirib.

Onun sözlərinə görə, xəstəliyin klinik gedişatında ağırlaşma və cari spesifik immunitetdən yayınma xüsusiyyəti araşdırılmaqdadır:

"İlk dəfə 9 noyabr 2021-ci il tarixində Cənubi Afrikada aşkarlanan bu variant 24 noyabr tarixinə qədər yüksək sürətdə yayılıb və həmin ərazi üzrə 3 dominant variantdan birinə çevrilib. Buna görə də ÜST-ə bu barədə məlumat verilib. ÜST isə bu variantı narahatlıq doğuran variant olaraq klassifikasiya edib. Hazırda sözügedən variantla əlaqədar dəqiq bilinən budur ki, yoluxma xüsusiyyəti öncəki ştamlarla müqayisədə daha yüksəkdir. Vaksin istehsalı ilə məşğul olan böyük şirkətlər isə bu varianta qarşı spesifik təkmilləşdirmə işlərinə başladıqlarını bildiriblər".

Aysel Səfərzadə

Telegramda izləyin