Narkotik aludəçisi olan 11 YAŞLI UŞAĞIN valideynləri haradadır? - AÇIQLAMA

Dünən barəsində xəbərlər yayılan 11 yaşlı uşağın narkotik istifadə etməsi, eyni zamanda küçələrdə qalması cəmiyyətdə xeyli narahatlıq doğurub.

O, yerləşdirildiyi dövlət müəssisəsi və sığınacaqlardan dəfələrlə qaçıb və psixi xəstəyə çevrilib. Bəs bu uşağın valideynləri haradadır? Əgər sığınacaqda olubsa, necə narkotik aludəçisinə çevrilib?

Mövzuyla bağlı Sonxeber.az Azərbaycan Uşaqlar Birliyinin sədri Kəmalə Ağazadədən açıqlama alıb.

O bildirib ki, dövlətin bu uşağa görə məsuliyyəti olduğundan o, valideynlərinin əlindən alınmalı idi:

"O uşaq sığınacağa yerləşdirilmir. Onun üçün xüsusi tipli müəssisə lazımdır. Narkotik asılılığı olduğuna görə, dəfələrlə bildirilib ki, o uşaq qapalı müəssisədə müalicə almalıdır. Təəssüf ki, Narkoloji Dispanserdə müalicəsi yarıda qalıb. Dediklərinə görə, qaçıb. Amma inanmıram. Dünən bununla bağlı mən paylaşım etdikdən sonra Bakı Şəhər Baş Polis İdarəsinin, Yasamal Polis İdarəsinin əməkdaşları onun axtarışını həyata keçirib. Bildiyim qədərilə, uşaq tapılıb.

Uşaq narkotik aludəçisidir, səhhətində çox ciddi problemlər var. Onun psixi durumu heç yerində deyil. O uşaq əsəb dispanserində davamlı olaraq müalicə almalıdır və digər xəstəlikləri aradan qaldırılmaq mümkün olmasa da, ən azından terapiya həyata keçirilməlidir.

Bunlar Roma qrupuna daxil olan qaraçı uşaqlarındandır. Yevlax rayonunda qeydiyyatdadırlar. Yasamal rayonu ərazisində yaşayırlar. Ailəyə bir-iki dəfə təhvil verilib. Təəssüf ki, ailə həssas qrupdan hesab olunur. İcra Hakimiyyəti tərəfindən qiymətləndirilmə aparılmayıb. Dövlətin bu uşağa görə məsuliyyəti olduğundan, valideylərinin əlindən alınmalı idi. Sənədi olmadığı üçün artıq birbaşa dövlət nəzarətinə keçirilməli bir uşaqdır".

Aysel SƏFƏRZADƏ

Telegramda izləyin

instagramda izləyin