Qadın cüdoçularımızın əsas yarışlara yollanmamasının səbəbi bilindi: Əməliyyat olunanlar var

"Qadınlardan ibarət cüdo üzrə milli yığma komandanın bu il üçün proqramına əsasən, komanda üzvlərinin Paris və Təl-Əviv "Böyük Dəbilqə" turnirlərində iştirakı nəzərdə tutulmayıb".

Sonxeber.az-ın məlumatına görə,bunu Oxu.Az-a cüdo üzrə qadınlardan ibarət millimizin baş məşqçisi Rəşad Məmmədov bildirib.

O, qadın cüdoçularımızın ilin ilk cüdo yarışları olan Portuqaliya Qran-prisi (28-30 yanvar) və Paris "Böyük Dəbilqə"si (5-6 fevral) turnirlərində iştirak etməyəcəyini bildirib. Yalnız Sarayevo Avropa Açıq turnirinə (12-13 fevral) 6 cüdoçu ilə qatılan qadın millimiz 17-19 fevral tarixlərində keçiriləcək Təl-Əviv "Böyük Dəbilqə"sində də mübarizə apara bilməyəcək.

Rəşad Məmmədovun sözlərindən isə belə aydın olur ki, komandanın təcrübəli üzvlərinin olmaması yarışlarda iştirakı məhdudlaşdırır:

"Yığma komandanın aparıcı üzvləri Leyla Əliyeva və Gültac Məmmədəliyeva ötən ilin sonunda əməliyyat olunduqlarından məşqlərə yeni başlayıblar. Əməliyyatdan hələ 6 ay keçmədiyindən, onlar aparıcı turnirlərdə iştirak etmək üçün formada deyillər. İrina Kindzerskaya isə çiynindən yenicə əməliyyat olunub.

Digər idmançılarımız isə yeniyetmələrdən və gənclərdən ibarət olduğundan, onları ilk növbədə daha aşağı səviyyəli turnirlərdə sınayacağıq. Təəssüf ki, Portuqaliya Qran-prisi üçün planlaşdırdığımız idmançılarımızın iştirakı PCR testlərinin pozitiv çıxması səbəbindən mümkün olmadı. Ötən həftə Bosniya və Herseqovinada bəzi idmançılarımızı sınadıq. Növbəti sınaq isə 5-6 mart tarixlərində Praqada keçiriləcək Avropa Açıq turnirində olacaq. Həmin turnirdən sonra yığmanın üzvləri Avropanın qadın cüdosunda aparıcı ölkələrinin nümayəndələri ilə birgə təlim-məşq toplanışları keçirəcəklər. Həmin təlim-məşq toplanışlarından sonra 25-27 martda Tbilisidə keçiriləcək "Böyük Dəbilqə" turnirində hansı qadın idmançılarımızın sınaqdan keçiriləcəyi müəyyən ediləcək.

Qeyd edim ki, federasiya rəhbərliyi tərəfindən qadınlardan, gənc qızlardan və yeniyetmə qızlardan ibarət milli yığma komandaların hazırlığı üçün bütün şərait yaradılıb. Dekabrın sonunda ölkədaxili təlim-məşq toplanışı, yanvarın əvvəlində Antalyada beynəlxalq təlim-məşq toplanışı və yenə də bu ayın əvvəlində ölkədaxili təlim-məşq toplanışı təşkil edilib. Hazırlıq üçün lazım olan bütün digər məqamlar da təmin edilib".

Telegramda izləyin