"Ata-ana bilsə ki, buna görə həbs olunacaq..."- Deputatdan SƏRT TƏNQİD

Istiqamət: Uşaq və gənclərin fiziki və mənəvi inkişafı
Bu gün erkən yaşda ailələri tərəfindən ərə verilən qızlarımız az deyil. Əfsuslar olsun ki, bu işin üstü açılanda yalnız azyaşlı ilə evlənən "bəy" cəzalandırılır. Lakin qızlarını ərə verib təhsildən qoparan, "başlarından edən" "valideyn"lər isə azadlıqda cəzasız, heç nə olmamış kimi gəzirlər. Elə ata-analara hansı cəza verilməlidir?

Məsələ ilə bağlı Sonxeber.az-a deputat Fazil Mustafa açıqlama verib.

O, dəfələrlə bununla bağlı fikirlərini bildirdiyini vurğulayaraq bildirib ki, uşaqların erkən nigaha məcbur edilməsinə görə valideyn məsuliyyət daşmalıdır:

"15-16 yaşı tamam olmuş uşaqların ərə verilməsinə görə valideyn hüquqi məsuliyyət daşımalıdır. Ata-ana bilsə ki, buna görə həbs olunacaq, artıq heç bir valideyn bu addımı atmağa cəhd göstərməyəcək. Çünki bu, müəyyən dərəcədə biyabırçı bir hal alır, xüsusi ilə də bölgələrdə acınacaqlı durumun yaranmasına gətirib çıxardır. Bu kimi hallar qızlarımızı təhsildən uzaqlaşdırır.

Ona görə də sözügedən məsələ ilə bağlı qanunvericilikdə sərtləşdirilmələrə ehtiyac var. Konkret olaraq, biz ancaq oğlanla qızın hərəkətini müzakirə edirik və ya məsuliyyət onların üzərinə yönləndirilir. Əslində isə son günlər haqqında danışılan 15 yaşlı qızın başına gələn faciə bütövlükdə cəmiyyəti silkələməlidir. Burada valideyn məsələsi önəmlidir.

Digər tərəfdən, elələri var ki, valideynləri olmur. O zaman dövlətin bu uşaqlar üzərində qayğısı məsələsi diqqət çəkməlidir. Çünki dövlət sanki hansısa bir müəsissələrində onları barındırmağı "unudur". Bəzən məmurlar məsələyə diqqət yetirmirlər. Ona görə də qızlarımızın qorunması baxımından buradakı problemə həm də dövlətin müdaxiləsi önəmlidir.

Ümumiyyətlə, bu uşaqlar harada böyüyürlər, niyə bu vəziyyətə gəlirlər?!

Bu gün küçələrdə dilənən 10-15 yaşlı qızların gələcəyi budur.

Başqa nə ola bilər?! Ən yaxşı halda onlar gedib "ailə tablosu" altında yaşamağı seçirlər. Amma narkomniyaya düçar olan qızlar var. Bunların taleyi necə olacaq? Ona görə də bu məsələdə total bir nəzarət mexanizmi qurulmalıdır ki, xoşagəlməz hallar baş verməsin.

Sadalanan problemləri mütləq həll etmək lazımdır. Belə olmasa, bu, ənənə olaraq, zorakılığın daha da genişlənməsinə səbəb olacaq".

Material Azərbaycan Respublikası
Medianın İnkişafı Agentliyinin maliyyə
dəstəyi ilə hazırlanmışdır.
ZAİRA AKİFQIZI

Telegramda izləyin