"Ukraynanın üzərinə düşən bəzi məsələlər də var ki..." - Ekspertdən AÇIQLAMA

Fevralın 22-də Azərbaycanla Rusiya arasında müttəfiqlik qarşılıqlı fəaliyyəti haqqında Bəyannamə imzalanıb.

Bəyannaməyə Kremldə Azərbaycan Prezidenti İlham Əliyev və Rusiya Prezidenti Vladimir Putin imza atıblar.

Moskva Bəyənnaməsini şərh edən hərbi ekspert Ramil Məmmədli Sonxeber.az-a bildirib ki, bu Bəyənnamənin müvafiq bəndləri qarşılıqlı ərazi bütövlüyünün və suverenliyin tanınması, mədəni-humanitar, iqtisadi-siyasi münasibətlərin inkişafı və s. bu kimi vacib məsələləri özünə daxil edir:

"1992-ci ildə müstəqil dövlətlər birliyi yarandıqdan sonra keçmiş postsovet respublikaları arasında "Kollektiv təhlükəsizlik müqaviləsi" adlı sənəd imzalandı. Bu sənəd bütün tərəflərin bir-birinin, o cümlədən Rusiyanın Azərbaycanın və Azərbaycan tərəfinin də Rusiyanın təhlükəsizliyini təmin etməsini özündə ehtiva edir. Həmin sənədi baza sənədi kimi götürsək, bugünkü bəyənnamə həmin baza sənədin davamıdır. Yəni 30 ilə yaxın bir müddət ərzində iki ölkə arasında formalaşmış hərbi, texniki sahədə olan əməkdaşlıq genişlənəcək və yeni bir formaya qədəm qoyacaq.

Bu hansı formadır? Bu bəyənnamədə artıq bəzi məqamlar açıq şəkildə qeyd edilir ki, hər iki tərəf üçüncü tərəf olmadan bir-birinin təhlükəsizliyinin təmin olunmasında iştirak edir.

Azərbaycan-Ermənistan arasındakı münaqişənin həllində də bu sənədin müsbət mənada rolu olacaq. Çünki dünənə qədər Ermənistan KTMT-ni əsas götürərək, Rusiyanı Azərbaycana qarşı hərbi əməliyyatlara sürükləməyə çalışırdı, sözügedən Bəyənnamədən sonra isə bu məqam artıq ikinci mərhələyə keçmiş oldu və yaxud sıradan çıxarılmış oldu, ləğv edildi. Artıq Azərbaycanla Rusiya müttəfiq ölkələrdir, yəni bu ölkələrin bir-birinə qarşı hər hansı bir təhlükəsi ola bilməz".

"Rusiya-Ukrayna münasibətlərinin mövcud gərginlik fonunda müttəfiqlik bəyanatı Azərbaycana necə təsir edəcək?" sualına isə ekspert belə cavab verib:

"Azərbaycan postsovet respublikaları arasında yeganə ölkədir ki, həm Ukrayna, həm də Rusiya ilə olduqca sıx və normal münasibətlərə malikdir. Bu cür münasibətələr ölkələrimiz arasında hər hansı bir problemin yaranmayacağına ümid yaradır.

Azərbaycan Rusiya-Ukrayna məsələsində tərəf deyil. Azərbaycanın mövcud vəziyyəti və qarşıdakı proseslər onu deməyə əsas verir ki, Azərbaycan nə Rusiyanın, nə də Ukraynanın mövqeyini dəstəkləməyəcək. Hər iki ölkə də bu məsələyə anlayışla yanaşacaq. Çünki biz hələ də Ermənistanla münaqişə vəziyyətindəyik, münaqişə tam həll olunmayıb. Tez-tez atəşkəs pozulur. İlk növbədə bu problemlər öz həllini tapmalıdır.

Azərbaycan Ukraynanın ərazi bütövlüyünü tanıyır. Lakin Ukraynanın üzərinə düşən bəzi məsələlər də var ki, Ukrayna vəziyyətin yalnız özü təfindən həll olunacağını nəzərə almalıdır".

Aygün Osmanlı

Telegramda izləyin