Yeganə oğlu şəhid olan ana...

Milli Məclisin Mədəniyyət Komitəsinin sədri Qənirə Paşayeva Vətən Müharibəsinin şəhidi Fuad Xankişiyevin anası Saqibət Xankişiyeva ilə görüşüb.

Millət vəkili şəhid anasını dinləyib, qayğıları ilə maraqlanıb, ürək sözlərini bölüşüb.

Bildirilib ki, 1996-cı il təvəllüdlü Fuad ailənin tək övladı olub. Mehdi Hüseynzadə adına 3 saylı tam orta məktəbdə təhsil aldığı illərdə cüdo idman növü ilə məşğul olub, sonra Bakı Olimpiya İdman liseyində cüdo üzrə təhsilini davam etdirib və 2011-ci ildə məzun olub. 2011-2014-cü illərdə Mingəçevir Turizm Kollecində Bədən tərbiyəsi fakültəsində oxuyan Fuad bütün bunlarla yanaşı, həvəskar dizayn-dekor işləri də görüb.

2014-2016-cı illərdə Azərbaycan Silahlı Qüvvələrinin sıralarında müddətli həqiqi hərbi xidmət keçib. O, Azərbaycan Vətən Müharibəsi zamanı Füzuli, Xocavənd və Şuşa istiqamətindəki döyüşlərdə iştirak edib, öz cəsurluğu ilə seçilib. Fuad Şuşa istiqamətində - Daşaltıda gedən döyüşlərdə, 1553 metr yüksəklikdə qəhrəmancasına şəhid olub.

Fuad Xankişiyev "Vətən uğrunda", "Xocavəndin azad olunmasına görə", "Füzulinin azad olunmasına görə", "Şuşanın azad olunmasına görə", "Cəsur döyüşçü" medalları ilə təltif olunub.

Şəhid anasını 8 Mart – Beynəlxalq Qadınlar Günü münasibətilə təbrik edən millət vəkili hər zaman onun yanında olduğunu vurğulayıb.

Görüşdə "Nəfəs" İB sədri Firəngiz Balakişiyeva da iştirak edib./Axar

Telegramda izləyin