VALİDEYNLƏRİN DİQQƏTİNƏ: Uşaqlar arasında geniş yayılan Rotavirus nədir? - ARAŞDIRMA - ÖZƏL

Son günlər uşaqlar arasında geniş yayılan Rotavirus adlı infeksiya böyük narahatlıq yaratmağa başlayıb. Amma təəssüf ki, bir çox valideynlər virusun varlığından xəbərsizdirlər və uşaqları yoluxduqda nə baş verdiyini bilmirlər.

Sonxeber.az Rotavirusla bağlı araşdırmanı təqdim edir:

Rotavirus bağırsaq iltihabına səbəb olan, daha çox 6-24 ay uşaqların sıx yoluxduğu virus növüdür. 6-24 ay uşaqlarda çox görülsə də, 5-6 yaşına kimi olan uşaqlarda da, hətta böyüklərdə də yoluxma halına rast gəlinə bilir. Ümumiyyətlə, uşaqlarda ən sıx görülən ishal Rotavirus ishalıdır.

ROTAVİRUSUN ƏLAMƏTLƏRİ

Uşaqlarda ani temperatur və qusma ilə başlayan virus kəskin qoxulu, sayı 10-u ötən ishal ilə davam edir.

1. Temperatur

3. İshal

Rotavirus əsasən 3-9 gün müddətində davam edir, lakin daha uzun çəkə də bilər. Bu, uşaqların immun sisteminə görə dəyişir.

ROTAVİRUSUN MÜALİCƏSİ

Müalicə yalnız simptomlara görə aparılır.

1-ci simpton temperaturdur. İlk növbədə temperatura nəzarət edilməlidir. Lazım gələrsə, qızdırma salan dərman vermək olar.

2-ci və 3-cü simptonlar isə qusma və ishaldır. Yəni uşaq bu zaman çox maye itirir və həmin səbəbdən bol maye qəbul etməlidir. Südəmər uşaqlar sıx-sıx içməlidirlər.

Amma bəzi uşaqlar xəstəliyi çox ağır keçirir. Xəstəlik zamanı maye qəbul edə bilmir və ya qəbul etdiyi mayeni belə, qusur. Bu zaman uşaq mütləq xəstəxanaya yatırılmalı və damar yolu ilə maye qəbulu dəstəklənməlidir.

Xatırladaq ki, dünyada 3-cü ən çox uşaq ölümü səbəbi ishaldır. Yəni maye itkisi, susuzluq.

Uşağa maye qəbul etdirə bilmiriksə, xəstəxanada dəstək almaq lazımdır.

UŞAQLARDA SUSUZLUQ ƏLAMƏTLƏRİ

1. Göz yaşının olmaması və ya azalması;

2. Gözlərin çökməsi;

3. Dil-dodağın quruması;

4. Anormal, sürətli nəfəs alıb-vermə;

5. Əmgəyin batması;

6. Dərinin elastikliyinin azalması;

7. Az sidiyə getməsi.

Xəstəxanaya yatırıldıqda belə, edilməli olan maye qəbulunun təmin olunmasıdır - Rotavirusa yoluxan uşaqların əsas ehtiyacı təkcə maye qəbuludur.

Nəinki Rotavirus, ümumiyyətlə, heç bir virus antibiotiklə müalicə olunmur. Ona görə boşuna körpə uşaqlara antibiotik verməyin.

Rotavirus təəssüf ki, təkrar-təkrar yoluxula bilən virusdur. Bir dəfə yoluxduqda ömürlük immunitet qazandıran viruslardan deyil.

Qeyd edək ki, Rotavirusun 2 dozlu və 3 dozlu peyvəndi var. Peyvənd ağız yolu ilə verilir və ilk 6 ay içində verilib tamamlanması məsləhət görülür. Peyvənd uşaqları virusdan qorumur, amma yüngül simptonlarla keçirməklərinə kömək olur. Yəni peyvənd olunan uşaqlar da Rotavirusa yoluxa bilirlər.

BƏS ROTAVİRUSA NECƏ YOLUXULUR?

Nəfəs damcı və təmas yolu ilə, yəni, xəstə ilə təmasda olmaq və ya xəstələrin toxunduğu əşyalara toxunmaqla yoluxulur. Daha çox bağçada yoluxma halı yaşanır. Bağçaya gedən uşaqlar orada bir-birini asanlıqla yoluxdura bilirlər.

Diaqnozun dəqiqləşdirilməsi üçün nəcisdən test götürülür.

Peyvənd isə bizdə dövlət xəstəxanalarında edilmir. Yalnız özəllərdə var və təəssüf ki, qiyməti bahadır. Amma əsas məsələ budur ki, əksər analar belə bir peyvəndin (dolayısı ilə belə bir virusun) varlığından xəbərsizdirlər.

Bu peyvənd dövlet tərəfindən vurulmasa belə, sahə həkimləri valideynləri məlumatlandırmalıdırlar. Edib-etməmək artıq valideynin öz qərarıdır, amma məlumat verməkləri mütləqdir.

Aysel SƏFƏRZADƏ

Telegramda izləyin