Vətəndaşlarımız bu tarixdən öz ata-baba yurdlarına qayıdır - AÇIQLAMA-ÖZƏL

İstiqamət: İşğaldan azad olunmuş ərazilərə "Böyük Qayıdış"

"Cənab Prezident İlham Əliyevin rəhbərliyi ilə 44 günlük Vətən müharibəsində Azərbaycan tarixi qələbə qazandı və Ermənistanın 30 illik işğalına son qoydu. Əlbəttə ki, işğaldan azad olunduqdan sonra bu ərazilərə baxış keçirildikdə dəhşətli bir mənzərə ortaya çıxdı: daş daş üstündə qalmamışdı. Erməni vandalları buraları tamamilə darmadağın edib, bütün infrastukturu, sosial obyektləri, evləri, mənzilləri, dini, tarixi, mədəni obyektləri, ekologiyamızı tamamilə məhv və darmadağın etmişlər".

Bu sözləri Sonxeber.az-a açıqlamasında deputat Cavid Osmanov deyib.

O bildirib ki, bu, erməni vəhşiliyinin növbəti bariz nümunəsi idi:

"Onlar 30 il müddətində yalnız vandallıq göstərib, sanki bir vəhşi qəbilə kimi buraları tamamilə yerlə yeksan etmişdilər:

Azərbaycan Prezidenti Cənab İlham Əliyevin rəhbərliyi ilə işğaldan azad olmuş ərazilərimizdə, vətən müharibəsi bitdikdən dərhal sonra böyük yenidənqurma və bərpa işlərinə start verildi.

Ermənilərin Azərbaycana qarşı növbəti terroru bir milyondan çox minaların bastırılmasıdır. Bu sahədə təhlükəsizliyin təmin olunması istiqamətində çox mühüm addımlar atılır.

Azərbaycan öz gücü ilə müharibə bitdikdən sonra dünya tarixində heç zaman görünməyən böyük işlərə start verdi.

Burada, xüsusilə 8 ay ərzində, Füzuli Beynəlxalq Hava Limanın və 100 kilometrlərlə yeni avtomobil nəqliyyat yollarının tikintisi, dəmiryol xətlərinin çəkilməsi, çox ağır relyefə baxmayaraq qısa müddət ərzində yüksək gərginlikli elektrik enerjisi təminatı, təbii qazın verilməsi, içməli suyun verilməsi istiqamətində atılan addımlar, tarixi, dini abidələrin bərpası, eyni zamanda bir sıra şəhərlərin baş planlarının artıq təsdiqlənməsi bunun əyani sübutudur. Ölkəmizin Birinci vitse-prezidenti, hörmətli Mehriban xanımın rəhbərlik etdiyi Heydər Əliyev Fondunun bu işlərdə çox böyük əməyi olduğunu görürük.

Digər tərəfdən, artıq yaşayış evlərinin tikilməsi, o cümlədən Zəngilan rayonunda Ağalı 1, Ağalı 2 və Ağalı 3 kəndlərində Ağıllı kəndlərin pilot layihələrinin salınmasının şahidi oluruq.

Cənab Prezidentimizin də qeyd etdiyi kimi, 2022-ci ilin yaz-yay aylarında ilk növbədə 30 il öncə bu ərazilərdə yaşayan insanların Qarabağa köçürülməsi prosesi başlayacaq.

Əlbəttə ki, bu, Böyük Qayıdışın artıq startıdır və Ermənistanın işğalı nəticəsində Azərbaycanın tarixi və əzəli torpaqlarını tərk edən, 30 il müddətində məhz qaçqın və məcburi köçkün kimi yaşayan soydaşlarımız öz ata-baba yurdlarına qayıdacaqlar.

Sözsüz ki, qısa müddət ərzində bu qədər nəhəng işlərin görülməsi və soydaşlarımızın Qarabağa qaytarılması istiqamətində atılan mühüm addımlar bir daha Azərbaycan Prezidenti cənab İlham Əliyevin rəhbərliyi ilə Azərbaycan dövlətinin gücünün və qüdrətinin göstəricisidir. Bu hadisələr tarixi hadisələrdir və azad olunan ərazilərimiz bundan sonra da Azərbaycanın olacaq".

Material Azərbaycan Respublikası

dəstəyi ilə hazırlanmışdır.

ZAİRA AKİFQIZI

Telegramda izləyin