Azərbaycanlı fermerlər niyə süd sata bilmirlər?

Azərbaycanda süd istehsalı ilə məşğul olan fermerlər məhsullarını sata bilmirlər.

Bu barədə "Report"a açıqlamasında "Azərbaycan Südçülər Assosiasiyası" İctimai Birliyinin sədri Samir Eyyubov məlumat verib.

Onun sözlərinə görə, satış problemi həll olunmasa, süd istehsalçıları müflis ola bilərlər.

"Rusiya-Ukrayna müharibəsi fonunda Azərbaycana bu ölkələrdən, eləcə də Belarusdan süd məhsularının gətirilməsində ciddi problemlər var. Bu isə yerli südə və süd məhsullarına tələbatı artırmalı idi. Amma bazarda elə bir dəyişiklik yoxdur və fermerlərin məhsulları əllərində qalıb. Deməli, hardansa bazara ucuz məhsullar daxil olur. Şübhəsiz ki, həmin məhsulların keyfiyyəti aşağıdır, bununla belə, yerli istehsalçıların məhsullarını sıxışdırırlar", - deyə o qeyd edib.

S.Eyyubovun sözlərinə görə, hazırda azərbaycanlı fermerlər məhsullarını maya dəyərindən də aşağı qiymətə təklif edirlər, amma müəssisələr yenə də onları almır. Baxmayaraq ki, son vaxtlar südün maya dəyəri də yerində saymayıb:

"Azərbaycan heyvan yemini əsasən idxal edir. Son vaxtlar xaricdə yem bahalaşıb və son nəticədə məhsulların maya dəyəri 40 % artıb. Amma fermerlər satış qiymətini artırmayıblar və əvvəlki qiymətlə zavodlara təklif edirlər. Bununla belə, alış yenə də yoxdur. Halbuki, məhsullar əvvəlki vaxtla müqayisədə heç olmasa 25-30 % baha satılmalıdır ki, fermerlərə müflis olmasınlar".

"Report" məsələ ilə bağlı fermerlərin də fikirlərini öyrənib. Bərdə rayonunda olan istehsalçı İbrahim Səfərov deyir ki, onların məhsul satmaq üçün faktiki olaraq seçim imkanı yoxdur:

"Əvvəl məhsulumuzu bir neçə şirkətə satırdıq. İndi cəmi bir şirkət bizdən süd alır. Onlar da qiyməti maya dayərindən aşağı qoyublar, 3,5 % yağlılığı olan südün 1 litrini 61 qəpikdən alırlar. Halbuki, əvvəllər 80-85 qəpiyə satırdıq. Seçim olmadığı üçün məcbur olub dedikləri qiymətlə razılaşırıq. Onlar isə bizdən aldıqları qiymətdən təxminən 60 % baha olmaqla bazarda məhsul satırlar".

Samux rayonunda süd ferması olan Qiyas Həsənov da təxminən eyni sözləri deyir:

"Çox çətinliklə süd satırıq. Əvvəl 5 şirkətlə əməkdaşlıq edirdik. İndi 1 şirkətlə zülmlə işləyirik. Həmin şirkət də ürəyi istədiyi qiyməti qoyur. Məcbur olub məhsulumuzu həmin şirkətə satırıq. Bizdə təmiz sağılan çiy süd olur. Quru süd deyil. Heç quru südün mənşəyi də məlum deyil. Şirkətlər quru süd alır. İstehsala da onu qatır. Amma təmiz süd əlimizdə qalır, alan olmur. Əvvəl 70-90 qəpiyə südü satırdıq. İndi 61 qəpiyə südü satırıq. Halbuki, 1 kiloqram yemin qiyməti 35 qəpikdən 65 qəpiyə qalxıb".

Telegramda izləyin