"Prezidentin siyasətinin mərkəzində Azərbaycan xalqının rifahının təmin olunması dayanır"

"Prezident İlham Əliyevin sədrliyi ilə keçirilən 12 aprel müşavirəsində diqqət çəkən məqamlardan biri də Azərbaycanın yaxın gələcəkdə daha nəhəng iqtisadi potensiallar əldə edilməsi ətrafında irəli sürülən fikirlər oldu".

Bu sözləri Sonxeber.az-a açıqlamasında Milli Məclisin üzvü Tamam Cəfərova deyib.

Deputat qeyd edib ki, bu ilin birinci rübünün nəticələri onu deməyə əsas verir ki, ölkəmiz günü-gündən daha da inkişaf edir, gələcəyə uğurla addımlayır:

"Bunu həm birinci rübün iqtisadi göstəriciləri, ölkəmizin beynəlxalq miqyasda artan nüfuzu, həm də işğaldan azad olunmuş ərazilərdə həyata keçirilən quruculuq işlərinin miqyası deməyə əsas verir. Azərbaycanda postmünaqişə dövrü ilə bağlı bütün planlar yerinə yetirilir, ölkəmizə olan maraq daha da artır. Bu maraq investisiya layihələrində öz əksini tapır. Təkcə bu ilin üç ayında iki böyük investisiya layihəsinə start verilib - bərpa olunan enerji üzrə iki elektrik stansiyasının təməli qoyulub. 470 meqavat gücündə olan stansiyalar xarici investorlar tərəfindən inşa edilir və gələn il istismara veriləcək.

Ölkənin iqtisadi göstəriciləri çox müsbətdir. Birinci rübün yekunlarındakı rəqəmlər, faktiki olaraq, heç bir şərhə ehtiyac qoymur. Ümumi daxili məhsul 6,8 faiz artıb. Qeyri-neft iqtisadiyyatımız 10 faizdən çox artıb. Sənaye istehsalı sahəsində artım təxminən 4 faizdir, ancaq qeyri-neft sənaye istehsalında 18 faizdən çoxdur. İqtisadiyyatın şaxələndirilməsi, neft-qaz sektorundan asılılığın azaldılması, həm ümumi daxili məhsuldakı, həm ixracdakı payının aşağı düşməsi – bütün bunlar reallıqlardır".

Fikirlərinin davamı olaraq, Tamam Cəfərova vurğulayıb ki, ölkənin xarici ticarət dövriyyəsi 60 faizdən çox, ixrac olunan məhsullar isə təxminən iki dəfə artıb:

"Burada neftin artan qiymətləri də nəzərə alınmalıdır. Ancaq qeyri-neft ixracımız da 45 faiz artıb. Bu da məhz aparılan islahatlar nəticəsində baş vermiş hadisədir. Bir il ərzində Azərbaycan xarici borcunu təqribən 600 milyon dollardan çox bir səviyyədə aşağı sala bilib. Bu da xarici borcun idarə edilməsi strategiyasının icrası nəticəsində mümkün olub. Bütün bunlar ölkəmizin iqtisadi potensialının yüksək səviyyədə olduğunun və sarsılmaz siyasi iradənin göstəricisidir.

Xatırladaq ki, cənab Prezident İlham Əliyev birinci rübün yekunlarına dair müşavirədə xarici ticarət balansının müsbət olduğunu qeyd etmişdi. Ölkə başçısı çıxışında "Xarici ticarətin balansı çox müsbətdir, müsbət saldo cəmi üç ayda 5 milyard dollardan çoxdur. Mütəxəssislər onu da bilirlər ki, dünyanın əksər ölkələrində saldo mənfidir. Ölkələr daha çox idxal edir, nəinki ixrac. Azərbaycanda isə təkcə üç ayda 5,1 milyard dollar gəlib. Bizim ixracımız idxalı üstələyir" deyə qeyd etmişdi.

Bütün bu nailiyyətlər Azərbaycanın daxili gücünün hesabına əldə olunub. Ölkəmiz heç kimdən bir manat dəstək almadan Qarabağ və Şərqi Zəngəzurda quruculuq və bərpa işlərini həyata keçirir. Əminliklə deyə bilərik ki, azad edilmiş torpaqlar yüz faiz daxili imkanlar hesabına bərpa olunur. Xarici şirkətlər yalnız podratçı kimi işləyir.

Eyni zamanda ölkə başçısı çıxışında minatəmizləmə fəaliyyəti haqqında da fikirlərini söyləyib. O, qeyd edib ki, "Müharibədən sonra işğaldan azad olunmuş ərazilərdə bastırılmış minalardan 200-dən çox insan həlak olub və ya ağır yaralanıb. Dünyada bu məsələ ilə məşğul olan o qədər fondlar, QHT-lər var. Gəlsinlər, kömək göstərsinlər. Maşın, mexanizmlər və texnika alınıb, hətta dronlar alınıb ki, o minalarla çirklənmiş yerləri təsbit edir. Ancaq mütəxəssis çatışmır, işçi qüvvəsi çatışmır".

Bu məsələdə də Azərbaycan öz gücü hesabına azad olunmuş əraziləri minalardan təmizləyir. Mövzu insan həyatı olsa da, ikili standartlar, hər zaman olduğu kimi, özünü göstərir. Buna baxmayaraq, qeyd etməliyik ki, Avropa İttifaqı Azərbaycana 2 milyardlıq kredit paketi elan edib. Bu, olduqca müsbət haldır. Erməni vandallığının nəticəsində 10 min kv.km ərazidə bir salamat bina qalmayıb. Əlbəttə, bu qədər geniş bir ərazidə quruculuq işlərinin həyata keçirilməsi çox böyük maliyyə vəsaiti hesabına mümkün ola bilər. Ona görə bu amil mütləq nəzərə alınmalıdır.

Şübhəsiz ki, Qarabağ və Zəngəzur nümunəvi bölgə kimi inkişaf etdiriləcək. Azərbaycan vətəndaşları orada rahat, firavan yaşayacaqlar. Dünya üçün də bu inkişaf bir nümunə olacaq".

Deputat onu da vurğulayıb ki, dünyada proseslər mənfi istiqamətdə gedir:

"Toqquşmalar, müharibələr alovlanır və gələcəkdə sabitliyin təmin edilməsi ilə bağlı müxtəlif fikirlər var. Ərzaq qıtlığı ola bilər. Hazırda dünyada ərzaq məhsullarının qiymətləri kəskin artır. Bu proses bir neçə ay bundan əvvəl başlanıb. Əlbəttə, Rusiya-Ukrayna müharibəsi bunu daha da sürətləndirib, xüsusilə nəzərə alsaq ki, Rusiya və Ukrayna dünyada aparıcı taxıl ixracatçıları arasındadırlar və digər ərzaq məhsullarını dünya bazarlarına ixrac edirlər. İndi artıq təbii qıtlıq hiss olunur və hiss olunacaq. Bu səbəbdən buğda ilə təminatımız diqqət mərkəzində olmalıdır. Azad olunan torpaqlarda əkin işlərinin daha da genişmiqyaslı aparılması üçün göstərişlər verilib.

Bütün bunlar onu deməyə əsas verir ki, dünyada gedən bütün mənfi proseslərə baxmayaraq, cənab Prezident İlham Əliyevin həyata keçirdiyi məqsədyönlü iqtisadi siyasət nəticəsində Azərbaycan xalqının həyat şəraiti daha da yüksələcək. Əminliklə deməliyik ki, ölkə başçısının həyata keçirdiyi siyasətin mərkəzində Azərbaycan xalqının rifahının, xoş güzəranının təmin olunması dayanır".

Aysel Yusifqızı

Telegramda izləyin