Narkotik istifadəsi ilə bağlı yeni qanun narkomaniyanı artıracaq? - AÇIQLAMA

"Milli Məclisin ötən iclasında narkotik və psixotrop maddələrin qanunsuz dövriyyəsi və narkomaniya ilə mübarizənin gücləndirilməsi məqsədi ilə Cinayət Məcəlləsinə dəyişiklik layihəsini qəbul etdik".

Bu sözləri Sonxeber.az-a açıqlamasında millət vəkili Bəhruz Məhərrəmov deyib.
Onun sözlərinə görə, bu, qanunvericilik səviyyəsində çox mütərəqqi bir addım hesab edilməlidir:

"Bildiyiniz kimi, bizim qanunvericiliyimiz narkotik və psixotrop maddələrin qanunsuz dövriyyəsinə iki prizmadan - satış üçün və satış məqsədi olmadan bu əməlin törədilməsi formatında yanaşır.

Bu günə qədər qanunvericilikdə satış məqsədi olmadan, yalnız "şəxsi istehlak miqdarından artıq" miqdar nəzərdə tutulurdu. Yəni məqsəd satış deyilsə, hər kəsə eyni yanaşım var idi və bu da, təbii ki, ədalətli yanaşma ola bilməz.

Dəyişikliklə isə biz satış məqsədi olmadan, "xeyli", "külli" və "xüsusilə külli" miqdar formatını müəyyən etdik.

Müqayisə üçün qeyd edim ki, əvvəllər satış məqsədi olmadan, qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə, saxlama, hazırlama, emal etmə, daşımaya görə bir ildən üç ilədək müddətə azadlığın məhdudlaşdırılması və ya üç ilədək müddətə azadlıqdan məhrum etmə cəzası nəzərdə tutulurdu.

Dəyişikliklə isə satış məqsədi olmadan, qanunsuz olaraq narkotik vasitələrin və ya psixotrop maddələrin "külli" və "xüsusilə külli" miqdarına görə sanksiyaları 15 ilədək müddətə azadlıqdan məhrum etməyə qədər sərtləşdirdik.

Həmçinin, dəyişikliklə "xeyli" miqdardan aşağı miqdar isə inzibati xəta kimi qiymətləndiriləcək. Bu məqsədlə İnzibati Xətalar Məcəlləsinə də dəyişiklik edərək "şəxsi istehlak miqdarında" sözləri "az miqdarda" sözləri ilə əvəz edildi.

Yəni bu o demək deyil ki, kimsə az miqdarda narkotik vasitə və psixotrop maddəyə görə cəzasız qalacaq. Belə şəxslər də inzibati məsuliyyətə cəlb ediləcəklər.

Habelə, başqa bir dəyişiklik bu oldu ki, Məcəlləyə 234.4.4. maddəni əlavə edərək bu tip cinayətlərin KİV-dən, o cümlədən internet informasiya ehtiyatları və ya informasiya-telekommunikasiya şəbəkələrindən istifadə etməklə törədilməsinə görə 5 ildən 12 ilədək müddətə, bu əməllər xüsusilə külli miqdarda törədildikdə isə 10 ildən 17 ilədək müddətə azadlıqdan məhrum etmə cəzası müəyyən etdik.

Qeyd edim ki, dəyişiklikləri qəbul etsək də, hələlik qüvvədə deyil və yalnız yaxın zamanlarda narkotik vasitələrin və ya psixotrop maddələrin miqdarlarını müəyyən edən yeni bir qanun qəbul edildikdən sonra həmin normativ hüquqi aktla eyni gündə qüvvəyə minəcək".

ZAİRA AKİFQIZI

Telegramda izləyin