"Zəngilan beynəlxalq investorlar üçün cəlbedici bir məkana çevriləcək"
"Azərbaycan Respublikasının Prezidenti cənab İlham Əliyev may ayının 4-də Zəngilan iqdisadi rayonuna daxil olan Zəngilan rayonuna prezidentin xüsusi nümayəndəsinin təyin olunması ilə bağlı çıxşında postmüharibə dövrünün bir sıra vacib məsələlərinə diqqəti cəlb edib. Ermənistanın işğal dövründə Azərbaycanın ərazilərində, eləcə də Zəngilan rarayonunda törətdiyi vəhşilik, dağıntı, barbarlıq və vandalizm hərəkətləri də xüsusilə vurğulanıb".
Bu sözləri Sonxeber.az-a Milli Məclisin deputatı, siyasi elmlər doktoru, professor Elman Nəsirov deyib.
O bildirib ki, Prezident Zəngilanda faktiki olaraq salamat bir binanın qalmadığını vurğulayıb:
"Yalnız bir neçə bina qalmışdı, o da yalnız erməni hərbçilərinin özlərinin yerləşdiyi binalar idi.
İlham Əliyev vurğulayıb ki, onlar təkcə tarixi, mədəni abidələri məhv etməyib, eyni zamanda meşə zolağına çox böyük zərbə endiriblər.
Meşə zolağının 50-60 faizi məhv edilib. Zəngilan, Avropa məkanında çinar ağaclarının geniş yayıldığı ən böyük areal olaraq, daha böyük itkilərə məruz qalıb.
Prezident Bəsitçay Dövlət Təbiət Qoruğunda ermənilərin törətdiyi vəhşiliyə xüsusi diqqət cəlb edib, onların ərazilərimizdə həyata keçirdiyi həm mədəni, həm də ekoloji terror siyasətinə toxunub və vurğulayıb ki, Ermənistan bütün cinayətlərə görə cavab verməli olacaq. Biz ermənilərin dağıtdığı bütün məkanlarda foto və video çəkilişlər aparmışıq. Onların vəziyyəti və dağıntının miqyası ilə bağlı qeydlər aparmışıq. Gələcəkdə beynəlxalq məhkəmələrdə Ermənistana qarşı öz haqq səsimizi ucaldacağıq! Ermənistan məsuliyyətə cəlb olunmalıdır və təzminat ödəməlidir!
Zəngilan ərazisində olan qızıl və digər yataqlardan həm ermənilərin, həm də onların xaricdəki havadarlarının, şirkətlərin istifadə etməsi, eləcə də digər qanunazidd hərəkətləri ilə bağlı məsələləri beynəlxalq məhkəmələrdə qaldıracağıq.
Eyni zamanda, ölkə başcımız qeyd edib ki, Zəngilanda quruculuq işləri sürətlə gedir. Artıq bu il Zəngilan Beynəlxalq Hava Limanı istifadəyə veriləcək.
Zəngəzur dəhlizinin mühüm hissəsi məhz Zəngilan ərazisindən keçir və artıq bu istiqamətdə həm dəmiryol, həm də avtomobil xətlərinin çəkilişi prosesi sürətlə irəliləməkdədir.
Bütün bu proseslər nəticəsində Zəngilan öz coğrafi şəraitinə, potensialına, unikal vəziyyətinə görə beynəlxalq investorlar üçün cəlbedici bir məkana çevriləcək.
Zəngilanın nəqliyyat-logistika mərkəzlərindən birinə çevrilməsi imkanları və potensialı çox böyükdür.
Zəngilan, Zəngəzur dəhlizin tərkib hissəsi olaraq, təkcə Azərbaycanın əsas hissəsini Naxcıvanla birləşdirməyəcək, eyni zamanda beynəlxalq nəqliyyat yolunun üzərində mühüm məntəqə kimi onun statusu daha da genişlənəcək.
Prezident bir daha vurğulayıb ki, qarşımızda dayanan hədəfləri həyata keçirmək üçün bizdə siyasi iradə, iqdisadi potensial, insani resurslar, maliyyə resurslarımız və beynəlxalq əməkdaşlığımız var. Keçən il Qarabağın bərpası ilə bağlı işlərə 2.2 milyard manat vəsait ayrılıb, bu il yenə 2.2 milyard manat vəsait ayrılıb. Yəni iki il ərzində ümumilikdə 4.4 milyard vəsait Qarabağın bərpası işlərinə yönəlib və bu proses çox sürətlə getməkdədir".
ZAİRA AKİFQIZI
Sonxeber.az Telegramda izləyin instagramda izləyin
Şikayətiniz varsa Whatsapp: 051 7028255
Facebookda Paylaş