"Heç kim Ermənistanı Azərbaycan əsgərinin qəzəbindən qoruya bilməyəcək"

Son Brüssel görüşündən sonra Azərbaycanın tələblərinə razılıq verən Ermənistan yenə "gah mıxa, gah da nala vurmağa" başlayıb. Moskva görüşündən sonra ciddi şəkildə dəyişən Ermənistanın Baş naziri Nikol Paşinyan öz bəyanatlarında yenə də sərsəm fikirlər irəli sürməkdən vaz keçməyib. Hətta onun Niderlandda səfərdə olduğu zaman yerli rəsmilərin, o cümlədən erməni diasporunun nümayəndələri qarşısında səsləndirdiyi nitq sadəcə böyük bir fiasko və erməni xislətinin göstəricisidir. Elə bu məqamda yenə də sərhəddən təxribat xəbəri eşitdik. Ermənistan adəti üzrə yenə atəşkəsi pozaraq öz ənənəsinə sadiq qaldı. Maraqlıdır, müharibə bitdiyi halda onlar niyə yenə təxribat törədirlər? Bu işlərin pərdəarxasında Baş nazir özü dayanır, yoxsa "gizli bir əl" burada vəziyyəti gərginləşdirir? Proseslərin indiki axarında Ermənistanın təxribatlarının qaşrısı necə alınmalıdır? Məsuliyyətə kimlər cəlb oluna bilər və ya olunmalıdır?

Məsələ ilə bağlı Sonxeber.az-a millət vəkili Bəhruz Məhərrəmov açıqlama verib.
O bildirib ki, Ermənistan tərəfinin atəşkəsi yenidən pozması İrəvanın əslində sülh niyyətinin olmadığını göstərir:

"Baş nazir Nikol Paşinyanın Niderlandda səsləndirdiyi ittihamlar fonunda təhlil edərkən Ermənistan rəhbərliyinin sülh sazişi üzrə davranışlarının əslində imitasiya olduğu ilə bağlı şübhə yaranır. Bu, özlüyündə çox təhlükəli bir tendensiyadır və açıq demək lazımdır ki, mövcud təhlükəli situasiya Azərbaycan yox, erməni xalqı və dövləti üçün təhdiddir.

Azərbaycan qalib tərəfdir. Müharibədə qazanılmış təcrübənin təhlili əsasında aparılan hərbi islahatlar, ordu quruculuğunun daha müasir standartlar əsasında aparılması və alınan yeni silahlar hesabına ötən dövr ərzində daha da güclənmişik. Bu mənada Ermənistanı istədiyimiz şərtlə razılaşmağa hər an məcbur edəcək gücümüz var.

Cənab İlham Əliyev də dəfələrlə deyib ki, bizi heç kim dayandıra bilməz. Ona görə də Ermənistan sülh prosesini bir şans kimi görməli, cənab İlham Əliyevin xoş niyyətinə qalib tərəfin mərhəmət ətası kimi baxmalıdır. Əks halda atəşkəsi pozanı da, ona bu əmri verəni də, bu əmri verən dövləti də kökündən qazımağa gücümüz və imkanımız var.

Necə ki, 44 günlük müharibədə kimsə qarşımızı ala bilmədi, günü bu gün əməliyyatlara başlasaq heç kim Ermənistanı Azərbaycan əsgərinin qəzəbindən qoruya bilməyəcək. İrəvan da, fərari toplum olan ermənilər də bunu, nə qədər gec deyil, anlasınlar. Ermənistanda nə baş verir, özləri bilər, bu onların daxili işidir. Lakin ermənilərin daxili məsələlərinə bizi vasitə etmək, atəşkəsi pozmaqla nəyəsə nail olmaq cəhdlərinə yol verilməyəcək. Məğlub və rəzil Ermənistanın borcudur ki, qalib xalqla, müzəffər dövlətlə davranışına diqqət etsin. Başa düşsünlər ki, Ermənistan adlı dövlətin mövcudiyyətini davam etdirib-etdirməməsi Müzəffər Ali Baş Komandan İlham Əliyevin bir əmrinə bağlıdır".

ZAİRA AKİFQIZI

Telegramda izləyin

instagramda izləyin