"İndi biz uşaqlarımızı təhsil almağa göndərməyək ki, müəllim onu döyəcək?!"

Xəbər verdiyimiz kimi, Zəngilan rayonu 35 saylı məktəbin Məshəti adlı musiqi müəllimi 8-ci sinif şagirdini döyüb. Bununla bağlı görüntülər sosial şəbəkələrdə yayılıb. Qeyd edək ki, bu, ilk belə hadisə deyil. Bundan əvvəl də şagirdin müəllim tərəfindən döyüldüyünü əks etdirən görüntülər olub. Müəllimlərin belə rəftarlarının səbəbi nədir?

Bununla bağlı Sonxeber.az-a təhsil eksperti Kamran Əsədov fikir bildirib.

O məsələyə biraz ironik yanaşaraq, əslində müəllimin şagirdi döymədiyini, sadəcə "masaj etdiyini" deyib:

"Yeni təhsil strategiyasının əsasına görə, uşaqlarda hər hansı bir problem və narahatlıqlar varsa, onları "masaj" edib sağaltmaq lazımdır. Bu, "Gələcəyə baxış" təhsil konsepsiyasının əsasını təşkil edir. Yəni orada müəllim uşağı döymür. Sadəcə uşağın başında qaşınma, belində ağrı olduğu üçün müəllim onu yoluna qoymağa çalışır.

Zarafat bir yana, inanın ki, hazırkı vəziyyət yaxşı və şükürlüdür. Bunun daha betəri olacaq! Nə qədər ki, təhsildən xəbərsizlər, təcrübəsizlər təhsildə "at oynadır" və cəzasız qalır, belə də olacaq!

Gündə dövlət büdcəsindən pul ayırıb kitab çıxardırlar. Ortada heç nə yox! Müəllim şagirdi döyür, şagird şagirdi bıçaqlayır. Daha nə gözləyirsiniz?

Bunların səbəbi cəzasızlıqdır. Artıq nəzarət itib.

Biz demirik ki, uşaqların hamısı yaxşıdır. Lakin uşaq müzakirə elementi ola bilməz. Siz müəllimsinizsə, bütün situasiyalara hazır olmalısınız.
Müəllimin psixoloji problemi var?! Belə çıxır ki, təhsil boş şeydi?! Hamımızın psixoloji problemi var. Onda qarşımıza kim çıxsa, döyək?!
Bu gün təhsil və tədris mühiti məhv olub. Müəllimi işdən çıxartmadınız. Lap yaxşı! Heç kim sizə "Müəllimi işdən azad edin" demir. Lakin normal sistem qurmaq lazımdır.

Camaat övladını məktəbə təhsil almağa göndərir. İndi biz uşaqlarımızı təhsil almağa göndərməyək ki, müəllim onu döyəcək?!
Bəli! Uşaqlar dəcəldirlər, şuluqdurlar, bunu başa düşürəm. Amma axı döymək metod deyil! Deməli, bəzilərinin təhsildən anlayışı yoxdur".

ZAİRA AKİFQIZI

Telegramda izləyin