""TEKNOFEST"in Bakıda keçirilməsi qardaş ölkənin Azərbaycana göstərdiyi etimadın, rəğbətin nəticəsidir" - Deputatla MÜSAHİBƏ

Bildiyimiz kimi, ilk dəfə möhtəşəm "TEKNOFEST " Aerokosmik və Teknologiya Festivalı Türkiyədən kənarda, Azərbaycanda keçirilib.

Sonxeber.az-ın bununla bağlı suallarını deputat Nəsib Məhəməliyev cavablandırıb.

- Nəsib müəllim, bu mühüm festivalın ölkəmizdə keçirilməsinin əhəmiyyəti və dünyaya verdiyi məsajları ilə bağlı fikirlərinizi bilmək istəyərdik.

- "TEKNOFEST" festivalının ilk dəfə Türkiyədən kənarda, Bakıda keçirilməsi qardaş ölkənin Azərbaycana göstərdiyi etimadın, rəğbətin nəticəsidir. "TEKNOFEST Azərbaycan" Aerokosmik festivalı yüksək səviyyədə təşkilatçılığı və bir çox ölkələrdən gəlmiş yüzlərlə komandanın iştirakı ilə seçilirdi. Azərbaycan Prezidenti İlham Əliyevlə yanaşı, Türkiyə Prezidenti Rəcəb Tayyib Ərdoğanın, Nobel mükafatı laureatı Əziz Sancarın, pilotsuz uçuş aparatlarının ixtiraçısı Səlcuq Bayraqdarın iştirakı və çıxışlarında səslənən fikirlər bir daha göstərdi ki, ölkələrimiz ən yüksək səviyyədə müttəfiqlik dövrünü yaşayır.

Yeri gəlmişkən, xüsusi olaraq, qeyd etmək istəyərdim ki, hər iki Lider, eyni zamanda hər iki alim, əldə etdikləri nailiyyətlərə, Türk və müsəlman dünyası qarşısındakı tarixi xidmətlərinə görə gəncliyə ən gözəl nümunədir. Festivalda nümayiş olunan və Türk gəncliyinin beyninin məhsulu olan yüksək texnologiyalar hər kəsi heyran etdi.

- "TEKNOFEST Azərbaycan" Aerokosmik və texnologiya festivalında çıxış edən Türkiyə Prezidenti Rəcəb Tayyib Ərdoğan 2022-ci ilin iki qardaş ölkə üçün əhəmiyyətini vurğulayıb. O bildirib ki, cari il Türkiyə-Azərbaycan diplomatik əlaqələrinin 30 illik yubileyidir. Bu 30 illik dostluq münasibəti hər iki ölkə üçün nələri qazandırdı?

- 30 il ərzində siyasi, iqtisadi, mədəni və s. sahələrdə münasibətlərimiz ən yüksək, strateji müttəfiq səviyyəsinə qalxmaqla sevincimiz bir, kədərimiz bir olub. 44 günlük müharibə başlanan andan cənab Ərdoğan xüsusi bəyanatla Azərbaycanın yanında olduğunu göstərdi. Xəzərin karbohidrogen resurslarının Türkiyə vasitəsilə dünya bazarına çıxarılması, Şərq-Qərb nəqliyyat dəhlizinin fəaliyyətə başlaması hər iki ölkənin iqtisadiyyatının dəfələrlə böyüməsi ilə nəticələndi. Hərbi sənaye sahəsində, silahlı qüvvələr arasında əməkdaşlıq ən müasir döyüş qabiliyyətinə malik güclü orduların formalaşmasını təmin etdi. Qısa zaman kəsiyində Qarabağın işğaldan azad olunması bunun sübutudur.

Ümumiyyətlə, çoxşaxəli əməkdaşlıq gücümüzə güc qatmaqla beynəlxalq münasibətlər sistemində özünəməxsus yer tutdu. Artıq qlobal və regional güclər Azərbaycana yönəlik siyasətlərini qurarkən Türkiyə faktorunu nəzərə almaq məcburiyyətindədirlər. Türkiyəyə gəldikdə isə, Azərbaycan faktoru ilə hesablaşmalıdırlar.

Tarixi Şuşa Bəyannaməsinin imzalanması ilə dünyaya "Bir millət, iki dövlət" mesajı verildi. Ölkəmiz Türk dünyasının biri-birinə inteqrasiyası istiqamətində əhəmiyyətli rola malikdir və körpü rolunu oynayır. Bütün bunlar yeni dünya nizamında milli təhlükəsizliyimizin təminatı baxımından son dərəcə əhəmiyyətlidir.

- Mayın 31-də parlamentin son iclası keçirildi. Parlament 2022-ci il üçün yaz sessiyasında qarşıda duran vəzifələrini yerinə yetirə bildimi?

- Bütövlükdə demək olar ki, Parlament 2022-ci ilin yaz sessiyasında kifayət qədər məhsuldar fəaliyyət göstərdi və üzərinə düşən vəzifələrin icrasını təmin etdi. Təbii ki, görüləcək işlər çoxdur və cəmiyyəti narahat edən əksər məsələlər üzrə müzakirələr aparılır.

- Bu gün hər kəsi maraqlandıran məsələlərdən biri də Xankəndi, Xocalı və Xocavənddə yaşayan ermənilərə Azərbaycan vətəndaşlığının verilməsi ilə bağlıdır. Qarabağda yaşayan ermənilərə nə zamandan vətəndaşlıq verilməyə başlanılacaq?

- Cəmi iki il bundan əvvəl Qarabağ və ətraf rayonların işğaldan azad olunmasını həlli mümkün olmayan məsələ kimi arzu edirdik. Müharibə nəticəsində, Ali Baş Komandanın və müzəffər ordumuzun sayəsində torpaqlar azad olundu. Hadisələri tələsdirmək lazım deyil. Hər şey zamanla həllini tapacaq. Qarabağda yaşayan ermənilərə vətəndaşlıq verilənə qədər bir neçə mərhələdən keçməliyik. Sərhədlərin delimitasiya və demarkasiya məsələləri başa çatdırılmalı, kommunikasiyalar açılmalı, iqtisadi münasibətlər qurulmalı, ermənilər qanunvericiliyimizi qəbul etməli, sülh müqaviləsi imzalanmalıdır. Bütün bu məsələlər razılaşdırıldıqdan sonra ermənilərə vətəndaşlıq verilə bilər. İndidən dəqiq vaxtını demək düzgün olmaz.

- Nəsib müəllim, qısa müddət ərzində Şuşada bir neçə önəmli tədbirlər keçirildi. Bəs, 26 iyun Azərbaycan Respublikası Silahlı Qüvvələri günü ilə bağlı keçirilən hərbi parad da Şuşada təşkil edilə bilərmi?

- Şuşa artıq beynəlxalq siyasi, mədəni tədbirlərin keçirildiyi məkana çevrilib. "Xarı bülbül" festivalları, "Vaqif" poeziya günləri, İƏT-in parlament rəhbərlərinin, müxtəlif ölkələrin parlament komitələrinin iclasları və s. tədbirlərə mədəniyyət paytaxtımız ev sahibliyi edib.

Hərbi parada gəldikdə isə, təbii ki, miqyas baxımından "Azadlıq" meydanında keçirilən hərbi paradın Şuşada təşkil olunması qeyri-mümkündür. Yerləşdiyi relyef buna imkan vermir. Şuşada elə bir böyük ərazi yoxdur. Lakin orada dislokasiya olunmuş hissələrin keçidini təşkil etmək olar. Yəqin ki, məhdud sayda hərbçilərin iştirakı ilə bayram tədbiri keçiriləcək.

- İlk dəfə olaraq Şuşaya səfər etdiniz. Şuşaya ilk ayaq basdığınız an hansı hissləri keçirdiniz?

- Azərbaycan, Türkiyə və Gürcüstan parlamentlərinin beynəlxalq əlaqələr komitələrinin birgə iclasını Şuşada keçirdik. İlk dəfə idi ki, Şuşada olurdum. Təəssüratlarım həddindən çoxdur. Əsas onu deyə bilərəm ki, Füzuli Beynəlxalq Hava Limanında təyyarədən enən andan Şuşaya qədər yol boyu, erməni vəhşiliklərini öz gözlərimizlə gördük və özünü "mədəni millət" adlandırmaqla dünyanı bezdirən tayfanın törətdiyi vəhşiliklər hər kəsi heyrətləndirirdi.

Şuşanın çətin relyefini müşahidə edir, vaxtaşırı qonaqların suallarını cavablandırır, 19-cu əsrin əvvəllərində 1-ci erməni-müsəlman davasında, dahi Üzeyir Hacıbəylinin və Müslüm Maqomayevin bacanağı olmuş Həmzət bəy Xəlilovun başçılığı ilə balakənlilərdən ibarət süvari dəstəsinin Şuşada ermənilərə qarşı vuruşması barədə tarixi hadisələri danışır, müasir ordumuzla, Ali Baş Komandanımızla, bütövlükdə xalqımızla fəxr edirdim.

Qalib ölkənin vətəndaşı olmaq əvəzolunmaz hissdir!

Aysel Yusifqızı

Telegramda izləyin