ABŞ Ermənistana yenə səfir təyin etdi - Xanım Kviyen əvvəl Ukraynada çalışıb

ABŞ prezidenti Co Bayden Ermənistanda səfir vəzifəsinə təcrübəli diplomat Kristina Kviyenin namizədliyini irəli sürüb və təsdiqlənməsi üçün Senata təqdim edib.

Bu barədə Ağ Evin mətbuat xidməti məlumat yayıb.
Senatın müvafiq komitəsi yeni səfirin qanunvericilərin suallarını cavablandıracağı dinləmələr üçün tarix müəyyən etməlidir. Bundan sonra yuxarı palatada onun təsdiqi üçün səsvermə keçiriləcək.

Kristina Kviyen 2019-cu ildən ABŞ-ın Ukraynada səfiri olub, 2016-cı ildən 2019-cu ilin aprel ayına qədər ABŞ-ın Fransadakı səfirinin müavini, səfirliyin iqtisadi məsələlər üzrə müşaviri vəzifələrində çalışıb.

O, diplomatik fəaliyyəti dövründə Tailand, Böyük Britaniya, Avropa İttifaqı, Rusiya və Filippindəki nümayəndəliklərdə müxtəlif missiyalar yerinə yetirib. Kviyen həmçinin ABŞ Milli təhlükəsizlik şurasının AB, Ukrayna və Belarus üzrə direktoru vəzifəsində işləyib.

Kaliforniyalı diplomat siyasi elmlər üzrə bakalavr və strateji tədqiqatlar üzrə magistr dərəcəsinə malikdir.

ABŞ-ın Ermənistandakı səfiri vəzifəsini 2019-cu il fevralın 19-dan Linn Treysi tutur.

Telegramda izləyin