"Ölkəmizdəki bütün millətlər bir ailə kimi yaşayırlar" - Cavid Osmanov

İstiqamət: Dini və milli tolerantlıq, millətlərarası münasibətlərin inkişaf etdirilməsi
Azərbaycanda dini və milli tolerantlıq, millətlərarası münasibətlərin inkişaf etdirilməsi üçün hansı tədbirlər görülür?
Bununla bağlı Sonxeber.az-a açıqlama verən Milli Məclisin deputatı Cavid Osmanov bildirib ki, ölkəmizdəki bütün millətlər və dinlərin nümayəndələri bir ailə kimi yaşayırlar. Bu da Azərbaycanın dünya üçün nümunəvi göstəricisidir:

"Azərbaycan multikultural dəyərlərin qorunması, inkişaf etdirilməsi baxımından dünya üçün nümunəvi bir ölkədir. Ölkəmizdə müxtəlif dinlərin və millətlərin nümayəndələrinin birgəyaşayışı mövcuddur. Azərbaycanda digər dinlərə aid abidələrin qorunmasını Azərbaycan dövləti həyata keçirir. Digər tərəfdən ölkəmizdə dini liderlərin görüşü, mədəniyyətlərarası dialoq formu keçirilir. Hər dəfə də bura gələn qonaqlar Azərbaycanın həyata keçirtdiyi siyasəti çox yüksək qiymətləndirirlər. Əlbəttə ki, bu, prezident İlham Əliyevin bu sahəyə xüsusi diqqət və qayğı göstərməsinin nəticəsidir. Eyni zamanda bilirik ki, işğaldan azad olunmuş ərazilərdə erməni vandalları dini tarixi abidələrin dağıdıb. Sonradan yenidənqurma və bərpa işlərinin həyata keçirilməsində dini abidələrin bərpası da nəzərə alınır. Ölkəmizin vitse-prezidenti Mehriban xanım Əliyevanın rəhbərlik etdiyi Heydər Əliyev fondu bu sahədə böyük işlər görür, işğaldan azad olunmuş ərazilərdə tarixi dini abidələrin bərpası və yenidən qurulması prosesinə çox böyük töhfə verir. İşğaldan azad olunmuş mədəniyyət paytaxtı Şuşa şəhərində Heydər Əliyev fondu Xarıbülbül festivalı keçirilir ki, bu da ölkəmizdə yaşayan xalqların nümayəndələrinin festivalıdır. Dünya ictimaiyyəti də bunu hörmət və rəğbətlə qarşılayır. Ümumilikdə ölkəmizdə dini və mili tolerantlıq, millətlərarsı münasibətlər ən yüksək səviyyədədir.
Eyni zamanda Azərbaycan xüsusilə, Heydər Əliyev fondu digər ölkələrdə Vatikan, İtaliya, Fransa, Pakistanda dini, milli, mədəni abidələrin bərpası istiqamətində çox böyük işlər görür ki, bu da ölkəmizin bu sahəyə nə qədər diqqət yetirdiyinin bariz nümunəsidir. Əlbətttə ki, ölkəmizdəki bütün millətlərin , dinlərin nümayəndələri bir ailə kimi yaşayırlar. Bu da qeyd etdiyim kimi Azərbaycanın dünya üçün nümunəvi göstəricisidir".
Material Azərbaycan Respublikasının

dəstəyi ilə hazırlanmışdır.
Şəbnəm Lətifi

Telegramda izləyin