"Qalib Azərbaycan əsgəri üçrəngli bayrağımızı Şuşada dalğalandırmaqla yeni bir tarix yazdı"

"2020-ci il sentyabrın 27-də başlanan Zəfər yürüşü, 44 gün davam edən Vətən müharibəsi şanlı Ordumuzun rəşadəti, Ali Baş Komandanın qətiyyəti sayəsində Ermənistan və ona havadarlıq edənlərin məkirli siyasətinin puç olması ilə başa çatdı. Bütün təzyiqlərə, təhdidlərə baxmayaraq, Azərbaycan qələbə qazandı və tarixi ədalət bərpa olundu. Azərbaycan Ordusu şəhidlərin qanını yerdə qoymadı. Qələbəni bizə bəxş edən qəhrəman əsgər və zabitlərimiz bizim qürur mənbəyimizdir. Onların qəhrəmanlığı, onların şücaəti, fədakarlığı artıq dastana çevrilib. 27 Sentyabr Anım Günündə də bütün xalqımız şəhidlərimizin əziz xatirəsini böyük ehtiramla yad edir".

Bu sözləri BiG.AZ-a Milli Məclisin deputatı Aydın Hüseynov deyib.

O qeyd edib ki, xalq-iqtidar birliyi, güclü ordu tandemi nəhayətdə döyüş meydanında işğalçının məğlub edilməsi ilə bitdi:

"Ermənistan ordusunun "məğlubedilməzliyi" haqqında uydurulan miflər darmadağın edildi. Azərbaycan əsgərinin rəşadəti qarşısında erməni əsgəri ancaq qaçmaqla xilas ola bildi. Düşmən torpaqlarımızdan qovuldu. Azərbaycan özünün dünya birliyi tərəfindən tanınan ərazi bütövlüyünü təmin etdi. BMT Təhlükəsizlik Şurasının ərazilərimizin erməni silahlılarından boşaldılması ilə bağlı qətnamələrini Azərbaycan təkbaşına icra etdi".

Deputat bildirib ki, 1992-ci ildə təsis olunmuş ATƏT-in Minsk qrupu fəaliyyəti dövründə problemin həllinə yox, dondurulmasına çalışıb və bununla da illər ərzində aparılan danışıqlar nəticəsiz qalıb:

"Minsk qrupu həm işğalçıya, həm də işğala məruz qalmış tərəfə eyni münasibət bəslədi, münaqişənin həlli ilə bağlı qəbul olunmuş beynəlxalq qətnamələr kağız üzərində qaldı. Məsuliyyətli ölkə olaraq, Azərbaycan daim beynəlxalq hüquqa sadiqliyini nümayiş etdirib və münaqişənin danışıqlar yolu həllinə çalışmışdı. Bu dövrdə dünyanın mötəbər beynəlxalq təşkilatı olan BMT də işğalçı Ermənistana təzyiq göstərməkdə acizlik nümayiş etdirdi, tərəfləri sülhə çağıran bəyanatlarla kifayətləndi. BMT Təhlükəsizlik Şurasının Ermənistan silahlı qüvvələrinin işğal olunmuş Azərbaycan ərazilərindən dərhal çıxarılmasını tələb edən 4 qətnaməsi 27 il kağız üzərində qaldı. Beynəlxalq birlik bu sənədlərin icra olunması üçün Ermənistana heç bir təzyiq göstərmədi".

Millət vəkili hesab edir ki, 30 ilə yaxın münaqişənin tənzimlənməsində vasitəçi olan qurumların heç bir fəaliyyət göstərməməsi və bunun əksinə olaraq, işğalçıya dəstək olmaması xalqımızın haqlı narazılığı ilə qarşılanırdı:

"Ona görə də, Azərbaycan xalqı pozulmuş hüquqlarının bərpasını ancaq Ali Baş Komandanın qətiyyətindən, ordumuzun gücündən gözləyirdi. Çünki ATƏT-in Minsk Qrupu kimi tarixin arxivinə göndərilmiş təşkilatlar ancaq status-kvonun saxlanılmasına çalışıb. Amma Azərbaycan özünün hərbi gücü ilə döyüş meydanında bütün stereotipləri sındırdı.

Qalib Azərbaycan əsgəri üçrəngli bayrağımızı Şuşada dalğalandırmaqla yeni bir tarix yazdı. Bu, eyni zamanda yeni bir reallıq idi. Bu reallığın müəllifi Müzəffər Ali Baş Komandan İlham Əliyevdir. Məhz bu uğurlu strategiya bölgədə sülhü, təhlükəsizliyi, əməkdaşlığı ehtiva edir. Azərbaycanın müharibədən dərhal sonra Ermənistana təklif etdiyi 5 bənddən ibarət sülh konsepsiyası da bir-birinin ərazi bütövlüyünü, sərhədlərini tanımaq və beynəlxalq hüquqa əsaslanan münasibətlər formalaşdırmağa hesablanıb. Amma çox təəsüf ki, özünün işğalçı, təxribatçı və təcavüzkar mahiyyətindən imtina edə bilməyən Ermənistan ona uzanan sülh əlini tutmaq üçün cəsarət tapmır. Bunun əksinə, təxribatlara əl atır ki, bu da qarşı tərəfə böyük itkilər hesabına başa gəlir. Çünki bu gün bölgədə Azərbaycan özünün malik olduğu imkanlarla bu bölgədə söz sahibidir. Cənubi Qafqazda sülh strategiyası üçün ölkəmiz açıq mövqe ortaya qoyub. Bu, bölgədə mövcud olan digər dövlətlərin də qarşılıqlı maraqlar müstəvisində inkişafına hədəflənib. Bütün bunlar onu deməyə əsas verir ki, bu regionun çox böyük işıqlı gələcəyi var və burada əsas təkanverici qüvvə Azərbaycandır".

Telegramda izləyin