Çox yaxın qohumlar kimlərdir ? - Hüquqşünas açıqladı

Hüquq münasibətləri başlıca olaraq cəmiyyətin oxşar həyat tərzinə uyğun tənzimləndiyi üçün bir sıra münasibətləri dəqiq öyrənmək faydalıdır. Bu xəbərdə yaxın qohumların dairəsi, onlarla bağlı qanunvericiliyin mövqeləri barədə məlumat verməyə çalışacağıq.

Kimlər yaxın qohumlar sayılır və hansı münasibətlərdə bu qohumluq məsələləri ön plana çıxır?

"Hər hansı qətl hadisəsində və ya zorlama hadisəsində tərəflərin ən yaxın qohum olması xüsusi vurğulanır. Burada onların əslində yaxınlıq dərəcəsi, əlaqələrinin yüksək səviyyədə olması da vurğulamaq və diqqət yetirilməsi arzulanır. Amma nəzərə almaq lazımdır ki, qanunvericilikdə ən yaxın, lap yaxın, çox yaxın qohum anlayışı yoxdur".

Bu sözləri Sonxeber.az-a hüquqşünas Şamil Paşazadə deyib.

O bildirib ki, mediada, sosial şəbəkələrdə bəzən qohum, tanış və s. əlaqələr qarışdırıldığı müşahidə edilir.

"Bu kimi halları televiziya efirində bəzən jurnalistlərin, hüquqşünasların da istifadə etdiyini müşahidə etmək olar. Qanunvericilikdə qohum və yaxın qohuma bu cür anlayış verilir. Yaxın qohumlar deyəndə babalar, nənələr, valideynlər, övladlığa götürənlər, doğma və ögey qardaşlar və bacılar, ər-arvad, uşaqlar, övladlığa götürülənlər, nəvələr nəzərdə tutulur.
Ümumiyyətlə qohumlar deyəndə isə babaya və nənəyə qədər əcdadları ümumi olan şəxslər, ər-arvadın yaxın qohumları, babanın, nənənin, valideynin, övladlığa götürənin, doğma və ya ögey qardaş və bacının, uşağın, övladlığa götürülənin və ya nəvənin əri (arvadı) və ya onların yaxın qohumları hesab olunur".
AYSEL QULİYEVA

Telegramda izləyin