"Türkiyə bir neçə istiqamətdə terrorçuluğa qarşı mübarizə aparır" - Deputat

"İstambul şəhərinin İstiqlal küçəsindəki partlayış terror aktıdır. Həlak olanlara Allahdan rəhmət, yaralılara şəfa arzulayıram".

Bu sözləri Sonxeber.az-a danışan deputat Nəsib Məhəməliyev deyib.

Deputat qeyd edib ki, son illər qardaş Türkiyə bir neçə istiqamətdə terrorçuluğa qarşı mübarizə aparır:

"Suriya və İraqda, eləcə də, daxildə PKK, PYD, İŞİD, YPG kimi terror təşkilatlarının neytrallaşdırılmasına, Türk Silahlı Qüvvələri ilə yanaşı, jandarma hissələri amansız mücadilə verir. Problemin mürəkkəbliyi ondan ibarətdir ki, terrorçuların məskunlaşdığı düşərgələr, yüksək dağlıq ərazilərdəki mağaralarda yerləşir və ələlxüsus, bir çox xarici dövlətlər tərəfindən silahlarla, maliyyə resursları ilə, digər kommunikasiya xidmətləri ilə təmin olunur. Həmin ölkələr Türkiyənin günü-gündən güclənməsini, iqtisadi-texnoloji-hərbi inkişafını, beynəlxalq müstəvidə söz sahbinə çevrilməsini, haqqı pozulmuşların yanında olmasını həzm edə bilmir, bütün imkanları ilə, Türkiyəni özlərinin təsir dairəsində saxlamağa cəhd edirlər".

Deputat vurğulayıb ki, gələn il türk dünyası üçün taleyüklü prezident seçkiləri keçiriləcək:

"Seçkilər yaxınlaşdıqca qardaş ölkəyə qarşı iqtisadi, sosial, eyni zamanda müxtəlif destruktiv xarakterli təzyiqlər gözlənilir. Düşünürəm ki, həmin qüvvələrin bütün səyləri boşa çıxacaq. Türkiyə həm terror təşkilatlatlarına, həm də onlara dəstək verənlərə layiqli cavab vermək iqtidarındadır. İnşəallah, seçkilərdən sonra daha da güclənəcək, Azərbaycanla, digər qardaş ölkələrlə birlikdə xoşbəxt gələcəyi quracaq".

Aysel Yusifqızı

Telegramda izləyin