Prezidentin bu görüntüləri gündəm olub - FOTO - VİDEO

Bildiyimiz kimi, bu gün Azərbaycan Respublikasının Prezidenti İlham Əliyevin doğum günüdür. Ali Baş Komandanın 61 yaşı tamam olur. Prezident İlham Əliyevin bölgə səfərləri zamanı görüntüləri son zamanlar tez-tez gündəmə çevrilir.

BiG.AZ ölkə başçısının son bir neçə ildə çəkilən səmimi fotolarını təqdim edir:

Prezidentin ən son Şəkiyə səfəri zamanı pişiklə çəkilən fotosu. Burada Prezidentin Şəkidə qarşısına pişik çıxıb və dövlət başçısı ona nəvazişlə sığal çəkib. Bu görüntü sosial şəbəkə seqmentində paylaşılaraq geniş maraqla qarşılanmışdı. Bir çoxları bunu dövlət başçısının heyvansevərliyi kimi xarakterizə edib.

Prezident Əliyevin pişiklə olan ilk görüntüsü 21 oktyabr 2021-ci ildə yayılıb. Onun Zəngilan rayonunun Ağalı kəndində pişiyi sığallaması sosial şəbəkələrdə böyük maraqla qarşılanlb.

Sonrakı görüntülər 2022-ci ilin yazına aiddir. Mayın 10-da Azərbaycan Respublikasının Prezidenti və birinci xanım Mehriban Əliyeva Şuşa şəhərində səfərdə olublar. Həmin səfər zamanı da Prezidentin pişiklə çəkilən görüntüləri hər kəsdə maraq oyadıb.

Prezident İlham Əliyevin dekabrın 2-sində Şəkiyə səfəri zamanı çəkilən daha bir fotosu maraqla qarşılanıb. Bu şəkildə Prezident İlham Əliyev Birinci xanım Mehriban Əliyeva ilə əl-ələ səmimi görüntülənib.

Avqustun 17-də dünyaşöhrətli opera və estrada müğənnisi, bəstəkar, SSRİ-nin və Azərbaycanın Xalq artisti Müslüm Maqomayevin 80 illik yubileyinə həsr olunmuş xatirə gecəsində Prezident İlham Əliyev və birinci xanım Mehriban Əliyeva iştirak ediblər. Bu zaman Prezidentimizin Müslüm Maqomayevin həyat yoldaşı Tamara Sinyavskayaya qarşı etdiyi jest gündəm olub. İlham Əliyev M.Maqomayevin həyat yoldaşının pilləkənləri düşməkdə çətinlik çəkdiyini görüb və onu qucağına alıb.

Prezidentin "Harop"la fotosu. Bu görüntü Prezident İlham Əliyevin 2021-ci ilin 5 oktyabrında Cəbrayıl rayonuna səfəri zaman lentə alınıb. Rayonda Dövlət Sərhəd Xidmətinin yeni hərbi hissəsinə baş çəkən zaman ölkə başçısı İsrail istehsalı olan və II Qarabağ Müharibəsində yüksək effektivliyi ilə seçilən "Harop" pilotsuz uçuş aparatının fonunda şəkil çəkdirib.

Bu ilin sentyabrın 15-də Şanxay Əməkdaşlıq Təşkilatının sammiti çərçivəsində dövlət başçılarının qeyri-rəsmi görüşündən olan foto. Görüntüdə Özbəkistanda səfərdə olan dövlət başçılarının səmimi ortamda bir araya gələrək, həmsöhbət olduğu əks olunub. Sosial şəbəkələrdə sözügedən foto maraqla qarşılanıb və günün fotosu kimi təqdim olunmuşdu.

Prezident İlham Əliyevin Türkiyə Prezidenti Rəcəb Tayyib Ərdoğanla birlikdə oktyabrın 20-sində Zəngilana səfəri zamanı çəkilən fotosu. Səfər çərçivəsində İlham Əliyevin Zəngəzur Dost - Ağır Atletika Klubunda ştanq qaldırması görüntüləri sosial şəbəkələrdə böyük maraqla qarşılanmışdı.
2020-ci ildə çəkilmiş ən məşhur görüntülərdən biri də Prezident İlham Əliyev və Birinci xanım Mehriban Əliyevanın çəkdirdiyi qələbə işarəli foto olub. Bu şəkil Prezidentin xalqa müraciətində Şuşa şəhərinin erməni işğalından azad edildiyini elan etdikdən sonra, dövlət başçısı və xanımı Şəhidlər Xiyabanında olarkən çəkilib. Fotoda İlham Əliyevin əliylə "victory" (qələbə) işarəsini göstərməsi gündəm olaraq trendə çevrilmişdi.

Bu il ərzində yadda qalan digər foto və videoları da şərhsiz təqdim edirik:

BiG.AZ kollektivi adından Prezident İlham Əliyevi doğum günü münasibətilə təbrik edir, ona fəaliyyətində uğurlar, möhkəm cansağlığı arzulayırıq!

Telegramda izləyin