İzləmə rekordu qıran "Avatar"ın 10 gün ərzindəki gəliri AÇIQLANDI - FOTO-VİDEO

Amerikalı rejissor Ceyms Kemeronun "Avatar: Su yolu" ("Avatar: The Way of Water") filminin dünya üzrə kassası ilk 10 gündə 1 milyard dollara yaxınlaşıb.

BiG.AZ xarici mətbuata istinadən xəbər verir ki, 16 dekabrdan bütün dünyada yayımlanan film izləmə rekordu qırıb və Yeni il ərəfəsində cəmi 10 günə istehsalçılara ABŞ-da 250 milyon, bütün dünyada isə 855 milyon dollar qazandırıb.

Bu həftə gəlirin 900 milyon dolları keçəçəyi proqnozlaşdırılır.

Rejissor Ceyms Kameronun qeyd etdiyi kimi, "Avatar"ın çoxdan gözlənilən davamı olan "Su Yolu" əvvəlki hissə kimi emosional, lakin daha genişmiqyaslıdır.

Hadisələr ilk filmdəkilərdən 10 illər sonra baş verir. Hekayəyə əsasən, əsgər Ceyk Salli avatara çevrildikdən sonra Navi xalqının lideri olur və yeni dostlarını Yerdən gələn muzdlu iş adamlarından qorumaq missiyasını üzərinə götürür.

Baş rolları Sem Uortington, Zoi Saldana, Stiven Leng, Covanni Ribizi, Coel David Mur və Keyt Uinslet oynayırlar.

Xatırladaq ki, elmi-fantastik filmin ilk hissəsi 2009-cu ildə nümayiş olunub. Film insanların və Navi adlı yadplanetlilərin qarşılıqlı əlaqələri, Navi aləminə xətərli müdaxilə barədədir. Üç "Oskar" və bir "Qızıl Qlobus" mükafatını almış "Avatar" dünyanın ən gəlirli filmi olub.

Məlumata görə, üçüncü, dördüncü və beşinci hissə müvafiq olaraq 2024, 2026 və 2028-ci illər üçün planlaşdırılıb.

Telegramda izləyin