"Bu il Rusiyanın təcavüzünə son qoymaq lazımdır" - Zelenski

Ukrayna prezidenti Vladimir Zelenski bu il ölkəsində Rusiyaya qarşı davam edən müharibəyə son qoymaq üçün silah yardımına ehtiyac duyduqlarını bildirib.

Sonxeber.az xəbər verir ki, Ukrayna Prezidentliyinin rəsmi saytında verilən açıqlamada Zelenskinin videomüraciəti paylaşılıb.

Zelenski çıxışında Fransa prezidenti Emmanuel Makronla telefon danışığı apardığını və Fransanın ölkəsinə təkərli tanklar göndərəcəyini bildirib.

Fransanın bu silah dəstəyinin əhəmiyyətindən danışan Zelenski Rusiyaya qarşı müharibədə belə bir yardıma ehtiyac duyduqlarını bildirib.

Ukraynaya silah yardımının Avropanın təhlükəsizliyi üçün də vacib olduğunu deyib.

"Bu il Rusiyanın təcavüzünə son qoymaq lazımdır və terrorçu dövlətin məğlubiyyətini sürətləndirə biləcək müdafiə vasitələrinin heç birini gecikdirməmək vacibdir",- deyə Zelenski bildirib.

Rusiyanın Ukraynaya qarşı yeni hücum dalğasına hazırlaşdığını iddia edən Zelenski məsələ ilə bağlı bəzi ölkələrin liderlərini məlumatlandırdığını bildirib.

Əsas məqsədlərinin bütün Ukrayna torpaqlarının azad edilməsi olduğunu qeyd edən Zelenski ölkəsində tezliklə sülhün bərqərar olmasının vacibliyini vurğulayıb.

Rusiyanın ötən ilin sonuna qədər Ukraynanın Donbas bölgəsini tamamilə ələ keçirməyi planlaşdırdığını deyən Zelenski bildirib ki, Ukrayna silahlı qüvvələri bu bölgədə düşmənin irəliləməsinə imkan vermir.

Zelenski bəyan edib ki, Rusiya ordusu Donetsk bölgəsində hərbi mövcudluğunu artırmağa davam edir.

Şəbnəm Lətifi

Telegramda izləyin