Rusiya Braziliyadakı iğtişaşı pisləyib

Rusiya Braziliyada sabiq prezident Jair Bolsonarunun tərəfdarlarının Milli Konqres, Prezident Sarayı və Ali Məhkəmə binalarına hücumunu pisləyib.

Sonxeber.az xəbər verir ki, Kremlin sözçüsü Dmitriy Peskov paytaxt Moskvada jurnalistlərə açıqlamasında Braziliya prezidenti Luiz İnasiu Lula da Silvanı dəstəklədiklərini bildirib.

"Biz iğtişaşlara səbəb olanların hərəkətlərini ən sərt şəkildə qınayırıq. Təbii ki, biz Braziliya prezidenti Luiz İnasio Lula da Silvanın asayişi bərpa etmək üçün atdığı addımları tam dəstəkləyirik" ,- deyə Peskov bildirib.

"Lulanın ikitərəfli münasibətləri yaxşılaşdırmaq üçün göstərdiyi səyləri təqdir etməyə davam edirik" ,- deyə o əlavə edib.

Braziliyada ordunun müdaxiləsini tələb edən şüarlar səsləndirən radikal sağçı Bolsonaro tərəfdarları polis səddini aşaraq Milli Konqres binasına daxil olublar.

Etirazçıları dağıtmaq üçün gözyaşardıcı qazla müdaxilə edən polis qrupların Prezident Sarayı və Ali Məhkəmə binasına zorla daxil olmasına mane ola bilməyib.

Milli Konqresə və Prezident Sarayına basqın edən Bolsonaro tərəfdarları təhlükəsizlik qüvvələri tərəfindən bu binalardan çıxarılaraq nəzarətə götürülüb.

Şəbnəm Lətifi

Telegramda izləyin