"Bu gün bəzi saytlar reytinq xatirinə kriminal aləmin təbliğatı ilə məşğuldurlar" - DEPUTAT

Son zamanlar silahla törədilən cinayətlərin sayı artıb. Hər kəsi maraqlandıran sual silahların necə bu qədər əlçatan olması ilə bağlıdır.

Bu mövzuda Sonxeber.az-a danışan deputat Nəsib Məhəməliyev vurğulayıb ki, cinayət hadisələrindən heç bir cəmiyyət, hətta inkişaf etmiş ölkələr belə sığortalanmayıb:

"Cəmiyyət varsa, cinayət də var. Son dövrlər Bakı küçələrində avtomat silahlardan istifadə etməklə törədilən cinayət hadisələri də cəmiyyətdə narahatlığa səbəb olur. Fakt odur ki, hüquq-mühafizə orqanlarımızın gördükləri operativ tədbirlər nəticəsində həmin cinayətlər isti izlərlə açılır və cinayəti törədənlər qanuna müvafiq şəkildə cəzalandırılırlar".

Silahların əlçatan olmasına gəldikdə isə, deputat vurğulayıb ki, Azərbaycanda avtomat silahı asanlıqla əldə etməyin mümkün olduğunu düşünmür:

"Müəyyən obyektiv səbəblərdən biri o ola bilər ki, biz iki müharibə keçmiş ölkəyik. Birinci Qarabağ müharibəsində nizami ordunun, vahid komandanlığın olmaması, ayrı-ayrı özünümüdafiə dəstələrinin xaotik fəaliyyəti hər kəsə bəllidir. Bu baxımdan, silah-sursatın qeydiyyatının dəqiq aparılmaması, odlu silahların kriminal qrupların əlinə düşməsi mümkündür. Müharibədən çıxmış ölkələrdə belə hallar ola bilər. Şükürlər olsun ki, bizdə belə hallara az rast gəlinir. Olmasa, daha yaxşı olar. Bunun üçün tək hüquq-mühafizə orqanlarının yox, cəmiyyətin bütövlükdə mübarizə aparması lazımdır".

Deputat söyləyib ki, bu gün bizi narahat etməli əsas məsələlərdən biri gənclər arasında kriminal elementlərin təbliği, cinayətkar avtoritetlərin qəhrəman obrazında cəmiyyətə təqdim olunmasıdır:

"Təəssüflər olsun ki, bir çox KİV-lər, saytlar reytinq xatirinə kriminal aləmin təbliğatı ilə məşğuldurlar. Bəzi hallarda cinayətkrları ideallaşdırır, qəhrəman obrazını formalaşdırırlar. Təbii ki, problemə bu cür yanaşma, gənclərin, yeniyetmələrin psixikasında dərin iz buraxır. Nəticə etibarı ilə, bu, cəmiyyətin mənəvi deqradasiyasına səbəb olur. Qarşısı alınmasa, daha ağır fəsadlarla üzləşə bilərik. Elm və Təhsil Nazirliyi, Gənclər və İdman Nazirliyi, Mədəniyyət Nazirliyi, Dini İşlər Üzrə Dövlət Komitəsi, bu sahələr üzrə ixtisaslaşmış qeyri hökumət təşkilatlarının mütəxəssisləri birlikdə gənclərin tərbiyəsi ilə bağlı vahid konsepsiya işləyib hazırlanmalıdır. Hər şeyin kökündə ictimai-siyasi sabitlik durur və hər birimizin borcudur ki, gərgin əmək nəticəsində əldə olunmuş sabitliyi qoruyaq".

Aysel Yusifqızı

Telegramda izləyin