"Bayramqabağı bazarlarda qiymətlərə nəzarət gücləndirilməlidir" - DEPUTAT

"Bayramqabağı suni şəkildə qiymətləri qaldıran işbazlara qarşı nəzarət gücləndirilməlidir".

Bunu Sonxeber.az-a danışan deputat İqbal Məmmədov bildirib.

Deputat qeyd edib ki, sabah xalqımız ilaxır çərşənbəni və bir neçə gündən sonra da Novruz bayramını qeyd edəcək:

"Artıq sosial şəbəkələrdə ətin və digər məhsulların qiymətinin bahalaşması ilə bağlı statuslar paylaşılmaqdadı. Düşünürəm ki, bayramqabağı bazarlarda qiymətlərə nəzarət gücləndirilməlidir. Novruz bizim milli bayramımızdır. Bu bayramı hər kəs arzuladığı şəkildə keçirilməlidir. Təəssüf ki, tək Novruzda deyil digər bayramlarda da qiymətlər kəllə-çarxa qaldırılır. Bu birbaşa insanların cibinə girmək və talamaqdır. Bəzi işbazların bu özbaşınalığının qarşısı mütləq alınmalıdır".

Deputat vurğulayıb ki, səlahiyyətli qurumlar bu günlərdə bazarlarda monitorinq apararaq suni şəkildə qiymətləri qaldıranları qanunla cəzalandırmalıdır:

"Dövlət tərəfindən insanlarımızın sosial durumunun yaxşılaşdırılması istiqamətində lazım olan bütün addımlar atılmaqdadır. Bilirsiniz ki, hər il minimum əmək haqqı, pensiyalar və təqaüdlər artırılır. Təəssüf ki, bəzi işbazlar bunu fürsət bilib qiymətləri qaldırırlar. Bu yolverilməzdir. Hesab edirəm ki, bayramqabağı bazarlarda qiymətlər nəzarət gücləndirilməlidir".

Aysel Yusifqızı

Telegramda izləyin