"Erkən yaşda övladlarını evləndirən valideynlərə qarşı ictimai qınaq artırılmalıdır" - DEPUTAT

"15-16 yaşlı qızların valideynləri tərəfindən məcburi şəkildə evləndirilməsi mənə görə cinayətdir".

Bunu Sonxeber.az-a danışan deputat Cavanşir Paşazadə deyib.

Deputat son vaxtlar sosial şəbəkələrdə və saytlarda 15-16 yaşlı qızlarımızın evləndirilməsi ilə bağlı xəbərlərə rast gəldiyini vurğulayıb:

"O yaşda olan qızlarımıza həyat yoldaşı deyil, təhsil lazımdır. Təəssüf ki, bunu anlamayan valideynlər hələ də qalmaqdadır. Məhz buna görə də hazırda erkən nikah sosial problem kimi həm ölkəmizdə, həm də dünyada aktualdır. Qanunvericiliyə əsasən, 18 yaşına çatmış şəxslər evlənmək və ailə qurmaq hüququna malikdirlər. Amma bəzi valideynlər qanunları pozaraq övladlarını erkən yaşda məcburi nikaha cəlb edirlər. Düzdür, bəzən olur ki, erkən nikaha daxil olma qızların öz istəkləri ilə olur. Lakin çox vaxt valideynlərinin təzyiqi, ailədə maddi vəziyyətin çətin olması və digər səbəblərdən qızlarımız erkən yaşda ailə qururlar. Erkən nikah elə məsələdir ki, ən ağır cəza da tətbiq olunsa belə, bu yolla onun qarşısını almaq mümkün deyil. Tək çıxış yolu geniş təbliğatdır. Əgər biz erkən nikahın qarşısını almaq istəyiriksə, maarifləndirmə işlərini artırmalıyıq".

Deputat vurğulayıb ki, bu məsələdə hər kəsin üzərinə böyük məsuliyyət düşür:

"Erkən yaşda övladlarını evləndirən valideynlərə qarşı ictimai qınaq artırılmalıdır. Məktəblərdə valideyn və şagirdlər üçün erkən nikahın fəsadlarları ilə bağlı maarifləndirici tədbirlər keçirilməlidir. Televiziyada bununla bağlı videoçarxlar yayımlanmalıdır. Hər şeyi dövlətin və qanunvericiliyin üzərinə atmaq olmaz. Əgər biz erkən nikahların qarşısını almaq istəyiriksə, hər birimiz aktiv olmalıyıq".

Aysel Yusifqızı

Telegramda izləyin