"Növbəti üç ildə Azərbaycan və Almaniya arasında iqtisadi münasibətlər özünün rekord səviyyəsinə çatacaq" - ŞƏRH

"Almaniya xarici siyasət kursunda ən ciddi istiqamət dəyişikliyi edən Avropa ölkələrindən biridir. Şimal Axını layihələrinə arxa duran və Avropanı Rusiyanın karbohidrogen ehtiyatlarından daha çox asılı salan ölkə olmasına baxmayaraq sonda mövqeyində dəyişiklik etdi. Hətta müharibəyə başlayandan bəri Rusiyanın 5,32 milyard avro məbləğində aktivlərini dondurub. Azərbaycanla Almaniya arasında olan iqtisadi əlaqələrə gəlincə isə hazırda iki ölkə arasındakı ticarət dövriyyəsi pandemiyadan əvvəlki səviyyəyə gəlib çatmayıb. Belə ki, pandemiya vaxtı, yəni 2020-ci ildə 817,6 milyon dollarlıq dövriyyə 2021-ci ildə 1 milyard 284 milyon dolları keçsə də, bu göstərici 2019-cu illə müqayisədə 357 milyon dollar azdır. Çünki, 2019-cu ildə ticarət dövriyyəsi 1 milyard 641 milyon dollar olmuşdur. Ötən il (2022) isə ticarət dövriyyəsi nəinki 2019-cu ilə gəlib çatdı, əksinə yenidən 27 milyon dollar geriləyərək 1 milyard 257 milyon dollar düşdü. Ümumiyyətlə isə Azərbaycan və Almaniya arasında ən yuxarı ticarət dövriyyəsi 2,6 milyard dollarla 2014-cü ildə olmuşdur. Yəni, ticari dövriyyənin böyük rəsminə baxsaq geriləmə var".

Bu sözləri Sonxeber.az-a iqtisadi ekspert Eldəniz Əmirov deyib.

O bildirib ki, bütün bu dinamika onu göstərir ki, ölkə Prezidenti cənab İlham Əliyevin Almaniyaya səfəri siyasi baxımdan nə qədər önəmlidirsə, iqtisadi baxımdan bir o qədər vacibdir.

"Çünki iki ölkə arasında mövcud potensialdan səmərəli və doğru istifadə edilməsi üçün bu işgüzar səfərə çox böyük ehtiyac vardır.
Düşünürəm ki, bu il mümkün olmasa belə, 2024-cü ildə pandemiyadan əvvəlki göstəriciləri üstələmək mümkün olacaq. Növbəti üç ildə isə Azərbaycan və Almaniya arasında iqtisadi münasibətlər özünün rekord səviyyəsinə çatacaq. Hər halda Almaniyanın Avropada ən böyük, dünyada isə dördüncü iqtisadiyyata sahib olduğunu, Azərbaycanın isə sülh sazişindən sonra iri iqtisadi layihələrin olacagını nəzərə alsaq potensialın buna imkan verəcəyini deyə bilərik".

Telegramda izləyin