"Azərbaycan-Türkiyə arasındakı qardaşlıq münasibətləri regionda sabitliyin qorunmasına töhfədir" - DEPUTAT

"Martın 26-da Bakı Olimpiya Stadionunda Ağdamın "Qarabağ" və İstanbulun "Qalatasaray" komandaları arasındakı keçirilən xeyriyyə oyunu dünyaya qardaşlığımızın sarsılmaz olduğunu bir daha sübut etdi".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, Azərbaycan və Türkiyə arasında əlaqələrin bu cür inkişafı təkcə bu dövlətlərin yox, həm də regionun ümumi tərəqqisinə, sabitliyin bərqərar olmasına mühüm töhfələr verir. Ən önəmlisi isə Azərbaycan və Türkiyənin münasibətlərinin inkişafı türk dünyasının daha sıx şəkildə bir araya gəlməsinə də səbəb olur. Hazırda ölkələrimiz arasında həm siyasi, həm də iqtisadi müstəvidə sıx əlaqələr mövcuddur".

Deputat vurğulayıb ki, dünyada bir-birinin dövlət müstəqilliyini Azərbaycan və Türkiyə qədər dəstəkləyən, həmrəylik göstərən başqa bir nümunə demək olar ki, yoxdur:

"Xalqlarımızın yaxşı və pis gündə də bir-birinə dayaq olması, yardım əlini uzatması Azərbaycan-Türkiyə arasındakı möhkəm əlaqələrin salsılmaz olduğunu bir daha təsdiqləyir. 44 günlük Vətən Müharibəsi dövründə Türkiyənin bizə böyük mənəvi və siyasi dəstək verdiyi kimi fevralın 6-da baş verən dəhşətli zəlzələ zamanı da qardaş ölkəyə ilk yardım əlini uzadan Azərbaycan oldu. Martın 26-da təşkil olunan qardaşlıq oyunun məqsədi də Türkiyədə baş vermiş "Əsrin fəlakəti"nin - güclü zəlzələnin fəsadlarının aradan qaldırılmasına yardımdır. Görüşdən əldə olunan bütün gəlirlərin zəlzələdən əziyyət çəkənlərə yardım üçün Türkiyəyə göndərilməsi nəzərdə tutulur. Satışa çıxarılmış 62 mindən çox biletin qısa müddət ərzində satılması xalqımızın çətin gündə qardaş Türkiyəyə dəstəyinin əyani sübutudur.

Azərbaycan-Türkiyə əlaqələri davamlıdır. Düşünürəm ki, ikitərəfli münasibətlərimiz bundan sonra da uğurla inkişaf edəcəkdir. Bu gün Azərbaycan-Türkiyə arasındakı dostluq və qardaşlıq münasibətləri regionda əmin-amanlığın, sabitliyin qorunmasına mühüm töhfədir".

Aysel Yusifqızı

Telegramda izləyin