Hərbi xidmətdən gələn gəncə at oğurluğuna görə HÖKM OXUNDU

Abşeron Rayon Məhkəməsində oğurluqda təqsirləndirilən Həsən Quliyevin (soyadı şərti) cinayət işi üzrə məhkəmə istintaqı yekunlaşıb.

Pravda.az xəbər verir ki, hakim Şövkət Nəcəfovanın sədrliyi ilə keçirilən prosesdə hökm oxunub.

Məhkəmənin hökmü ilə ona 1 il 6 ay müddətinə azadlığın məhdudlaşdırılması (elektron qolbaq) növündə cəza təyin edilib.

İttihama görə, hadisə Abşeron rayonu, Güzdək qəsəbəsi ərazisində yerləşən mişar daşı ilə hasarlanmış qapısı olmayan boş sahədə qeydə alınıb.
Belə ki, 2002-ci il təvəllüdlü Həsən Quliyev zərərçəkmiş Qəfər Qəfərova (şərti) məxsus ümumilikdə 4500 manatlıq 3 ədəd atı oğurlayıb.

Məhkəmə baxışında Həsən Quliyev ona elan edilmiş ittiham üzrə özünü təqsirli bilib. O, ifadəsində deyib ki, valideynləri ilə birlikdə xalasına məxsus Abşeron rayonu, Qobu qəsəbəsində yerləşən nömrəsiz fərdi yaşayış evində yaşayır. Heç yerdə işləmir və hadisədən 3 ay əvvəl hərbi xidmətdən gəlibmiş.

Telegramda izləyin