"31 mart azərbaycanlıların soyqırımı bəşəriyyətə və insanlığa qarşı törədilən vəhşilikdir" - DEPUTAT

"31 mart azərbaycanlıların soyqırımı tək azərbaycanlılara qarşı deyil, bütün insanlığa qarşı törədilən erməni vandalizmidir".

Bunu Sonxeber.az-a danışan deputat Cavanşir Paşazadə bildirib.

Deputat qeyd edib ki, 31 mart soyqırımı-XX əsrin unudulmayacaq vəhşiliyidir:

1918-ci il martın sonlarından başlayaraq ermənilər azərbaycanlılara qarşı növbəti soyqırım aktını həyata keçirdilər. Müxtəlif bölgələrində törədilən qətliamlar nəticəsində on minlərlə Azərbaycan türkü və digər xalqların nümayəndələri vəhşicəsinə qətlə yetirilib. Sovet dövründə bu faciə bizə unutdurulmağa çalışıldı. Lakin bu gündə bu soyqırımı aktına dair çoxsaylı faktlar və sənədlər aşkarlanır və dünya ictimaiyyətinə çatdırılır. 31 mart azərbaycanlıların soyqırımı bəşəriyyətə və insanlığa qarşı törədilən vəhşilikdir. Azərbaycanda hər il 31 mart tarixi Azərbaycanlıların Soyqırımı Günü kimi qeyd edilir. Bu genişmiqyaslı qanlı aksiya nəticəsində yüzlərlə yaşayış məntəqəsi yerlə-yeksan edilib, minlərlə azərbaycanlı böyük amansızlıqla və qəddarlıqla qətlə yetirilib. Məqsəd də "böyük Ermənistan" dövlətini yaratmaq idi. Bu arzularını reallaşdırmaq üçün də ermənilər azərbaycanlılara qarşı düşünülmüş, planlı surətdə ayrı-ayrı mərhələlərdə soyqırım aktlar törətdilər. Təkcə milli mənsubiyyətinə görə, minlərlə dinc azərbaycanlı məhv edilib. Ermənilər evləri yandırıb, insanları diri-diri oda atıblar. Onlar tərəfindən milli-memarlıq abidələri, məktəblər, xəstəxanalar, məscidlər və digər tikililər dağıdılıb. Azərbaycanlıların soyqırımı xüsusi qəddarlıqla Bakı, Şamaxı Quba, Qarabağ, Zəngəzur, Naxçıvan, Lənkəran və Azərbaycanın digər ərazilərində həyata keçirilib. Bu torpaqlarda kütləvi qaydada dinc əhali qırılıb, kəndlər yandırılıb, milli mədəniyyət abidələri məhv edilib. Ermənilərin azərbaycanlılara qarşı törətdiyi bu soyqırımı nəticəsində 1918-ci ilin mart-aprelində Bakı, Şamaxı, Quba, Muğan və Lənkəranda 30 mindən çox soydaşımız qətlə yetirilib, 10 minlərlə insan öz torpaqlarından qovulub. Təkcə Bakıda 10 minə yaxın azərbaycanlı xüsusi qəddarlıqla öldürülüb, Şamaxıda 58 kənd dağıdılıb, 7 min nəfər (1653 qadın, 965 uşaq) məhv edilib. Quba ərazisində 122, Qarabağın dağlıq hissəsində 150, Zəngəzurda 115, İrəvan quberniyasında 211, Qars əyalətində 92 kənd yerlə yeksan olunub, əhali üzərində yaş və cinsə məhəl qoymadan qətliam həyata keçirilib.

Azərbaycan dövlət müstəqilliyini bərpa etdikdən sonra xalqımıza qarşı törədilən bütün vəhşiliklər və soyqırımlara beynəlxalq müstviyə çıxarıldı.Azərbaycan xalqına qarşı törədilmiş bütün soyqırımı faciələrini qeyd etmək məqsədilə 1998-ci il martın 26-da ulu öndər Heydər Əliyev "Azərbaycanlıların soyqırımı haqqında" Fərman imzalamışdı. Sözügedən Fərmanla martın 31-i "Azərbaycanlıların Soyqırımı Günü" elan edilib. Həmin Fərmanın icrasının ardıcıl və mütəşəkkil şəkildə həyata keçirilməsi ilə bağlı ulu öndər Heydər Əliyev 1999-cu il martın 30-da tədbirlər planı təsdiq edib. 2013-cü ildə, İlham Əliyevin qərarı ilə, soyqırımda öldürülənlərin xatirəsinə Quba Soyqırımı Memorial Kompleksi yaradılıb".

Deputat vurğulayıb ki, 44 günlük Vətən müharibəsində Ali Baş Komandan İlham Əliyevin rəhbəriyi ilə Azərbaycanın Müzəffər ordusu döyüş meydanında erməniləri ağır məğlubiyyətə uğradaraq "böyük Ermənistan" qurmaq arzularını ürəklərində qoydu:

"Növbəti hədəf isə qərbi azərbaycanlıların öz doğma yurdlarına qayıtmasıdır. İnanıram ki, tezliklə bu arzumuzda reallaşacaq".

Aysel Yusifqızı

Telegramda izləyin