Dünyaca məşhur masaüstü oyunun yaradıcısı öldü

Dünyaca məşhur "Catan" masaüstü oyununun yaradıcısı Klaus Toyber 70 yaşında vəfat edib.

BiG.AZ xəbər verir ki, bu barədə "New York Post" yazır.

Ailəsinin verdiyi məlumata görə, ağır xəstəlikdən əziyyət çəkən Toyber aprelin 1-də dünyasını dəyişib.

Toyber 25 iyun 1952-ci ildə Almaniyanın Ray-Braytenbax şəhərində anadan olub. 1980-ci illərdə Darmştadtda diş texniki işlədiyi zaman masaüstü oyunların yaradılması ilə məşğul olmağa başlayıb. Həmin dövrdə o, işdəki problemlərdən qaçmaq üçün başını bu məşğələyə qatmağa çalışıb və özü dediyi kimi, oyunlar onun öz əlləri ilə yaratdığı özünəməxsus bir dünyası olub.

"Catan" oyunu ilk dəfə 1995-ci ildə satışa buraxılıb və 3 il sonra çox məşhurlaşıb. Bu zaman Toyber yaratdığı oyun vasitəsi ilə ailəsini dolandıra biləcəyini anlayıb və sevmədiyi işindən ayrılıb.

Həmin dövrdən "Catan" bütün dünyaya yayılıb və ən məşhur masaüstü oyunlardan birinə çevrilib.

2020-ci ildə koronavirus pandemiyası dövründə bu oyuna maraq daha da artıb. Ümumilikdə oyun 40 dildə çap olunub, oxşarları yaradılıb və elektron oyun platformalarına köçürülüb.

Telegramda izləyin