"Dünyəvi təhsildə hər kəs bərabər olmalıdır" - Elçin Əfəndi

"Nazirlər Kabinetinin müvafiq qərarına əsasən, təhsilalanların, eyni zamanda təhsil verənlərin vahid geyim forması təsdiq olunub. Bu geyim forması sağlam təhsil mühitinin formalaşmasına, təhsilə yanaşmanın dəyişməsinə, həm təhsil verənlərin, həm də təhsilalanların geyim qaydalarına düzgün riayət etməsinə və ümumilikdə sağlam təhsil mühitinin mövcudluğuna xidmət edir".

Bunu Sonxeber.az-a açıqlamasında təhsil eksperti Elçin Əfəndi deyib.

O, bildirib ki, biz dünyəvi təhsildən danışırıqsa, bu təhsilin öz tələbləri var:

"Dünyəvi təhsildə hər bir şəxsin sosial bərabərliyini və hüquqlarını tanımalıyıq. Həm təhsilalanlar, həm də təhsil verənlər, xüsusilə geyim tərzi baxımından, bərabər olduqlarını nümayiş etdirməlidirlər. Hazırda Nazirlər Kabinetinin müvafiq qərarına uyğun olaraq vahid geyim formasına dair tələblər müəyyənləşdirilib və həm təhsilalanlar, həm də təhsil verənlər bu qaydalara riayət etməlidirlər. Şagirdlərin müəyyən yaş dövründə hər hansı dini inancı formalaşa bilər. Onlar xristianlıq, buddizm, yəhudilik, hinduizm, İslam və ya başqa bir dinə mənsub ola bilərlər. Bu, şagirdin öz dini etiqadıdır və o, dini etiqad azadlığına malikdir".

Ekspert bildirib ki, təhsil dünyəvidirsə, bu amillərə mütləq diqqət yetirilməli və dövlətin müəyyən etdiyi vahid geyim formasına riayət olunmalıdır:

"Eyni zamanda, hər bir şəxsin digərinin dini inancına hörmətlə yanaşması vacibdir. Bu yanaşma insanların bir-birini bullinqə və ya mobbinqə məruz qoymasının qarşısını almaq baxımından da əhəmiyyətlidir. Vahid geyim formasından istifadə zəruridir ki, gələcəkdə kiminsə dini inancı başqaları üçün narahatlıq yaratmasın və ya həmin şəxsin özünə qarşı qısnama, yaxud şiddət hallarına səbəb olmasın. Bilirsiniz ki, dövlətimiz tərəfindən dini inancı olan şəxslərə, hansı dinə mənsub olmalarından asılı olmayaraq, müəyyən imkanlar yaradılır. Ölkəmiz tolerant və multikultural ölkədir, hər bir şəxs üçün bərabər imkanlar təmin olunub. Bu gün ölkəmizdəki məscidlərin sayı elə İslam dünyasına aid bəzi ölkələrdəki məscidlərin sayından da çoxdur. Eyni zamanda, insanların ibadətinə dövlət tərəfindən hər hansı məhdudiyyət tətbiq olunmur. Bütün bunları nəzərə aldıqda, hər bir şəxsin dövlət tərəfindən müəyyən edilmiş qaydalara riayət etməsi vacibdir".

Röyalə Xəyal

Telegramda izləyin