Məktəblilər dərsə necə geyinməlidirlər? - Rəsmi qaydalar

Məktəblilər dərsə təhsil aldıqları məktəb üçün müəyyən edilmiş vahid geyim formasında gəlməlidirlər.

Sonxeber.az xəbər verir ki, rəsmi qaydalara əsasən, oğlanlar üçün şalvar, qısaqol və uzunqol polo tipli köynək, önü bağlanan cibli jaket, qızlar üçün isə şalvar və ya ətək, qısaqol və uzunqol köynək, jaket nəzərdə tutulur.

Geyimin rəngi və modeli məktəbin seçdiyi formaya uyğun olmalıdır. Şagirdlər müəyyən edilmiş formanın vahidliyini pozan digər geyim elementlərindən istifadə etməməlidirlər. Məktəbin emblemi formanın ön hissəsinin sol yuxarı tərəfində və ya sol qolunda yerləşdirilə bilər.

Məktəbli forması möhkəm, davamlı, rəngi solmayan, yuyulduqdan sonra ölçüləri dəyişməyən və təri yaxşı qəbul edən parçadan hazırlanmalıdır. Geyimin etiketində parçanın tərkibi və "məktəbli forması" ifadəsi göstərilməlidir.

Nazirlər Kabinetinin 21 sentyabr 2026-cı il tarixli qərarına əsasən, məktəbli forması ilə bağlı tələblərə riayət olunmasını təmin etmək valideynlərin məsuliyyətidir. Qaydalara əməl olunması ilə bağlı məsələlər isə məktəbin Pedaqoji Şurası tərəfindən həll edilir.

Müəllif: İlkin Məmmədkərimov

Telegramda izləyin