Sui-qəsd cəhdindən sonra Fazil Mustafadan ilk paylaşım - FOTO

Silahlı hücuma məruz qalan Milli Məclisin deputatı Fazil Mustafa güllələnmə hadisəsindən sonra ilk dəfə paylaşım edib.

Sonxeber.az xəbər verir ki, millət vəkili özünün "Facebook" hesabında status yazıb.

O, son əməliyyatından sonra yaralarına tikiş qoyulduğunu deyib:

"Əziz dostlar, məmləkətimizin dəyərli insanları. Dünən üç saatdan artıq çəkən son əməliyyatdan sonra yaralarıma tikiş qoyuldu. Həmd olsun Allaha ki, hər şey yaxşılığı doğru gedir. Allah həkimlərimizdən və tibb personalımızdan razı olsun. Bu günlərdə sağlıq durumumla bağlı narahatlıq keçirən, dualarını əsirgəməyən bütün duyarlı insanlarımıza təşəkkür edirəm. Müalicə və reabilitasiya prosesi davam edir, inşallah yaxın vaxtlarda yenə də qaldığımız yerdən mübarizəmizə davam edəcəyik. Allah millətimizi və dövlətimizi qorusun!"
Qeyd edək ki, martın 28-də axşam saatlarında Zabrat qəsəbəsində yerləşən evinin qarşısında silahlı hücuma məruz qalan millət vəkilinə avtomat silahdan çoxsaylı atəş açılıb. F.Mustafa iki güllə yarası alıb. Çiyin nahiyəsindən və ayağından yaralanan millət vəkilinə ilk olaraq Kliniki Tibbi Mərkəzdə həkim müdaxiləsi edilib. Sonra isə deputatın təhlükəsizliyinin daha yaxşı təşkil olunması məqsədilə o, hüquq-mühafizə qurumlarından birinin hospitalına aparılıb. Deputat 3 dəfə əməliyyat olunub.

Telegramda izləyin