Azərbaycanın ilk "Formula" pilotu: "Elə bilirəm ki, yarımçıq, tamamlanmamış bir işim qalıb"

"Azərbaycanın ilk və tək "Formula" pilotuyam".

Bunu azərbaycanlı idmançı Gülhüseyn Abdullayev "Report"a açıqlamasında bildirib.

"Formula-1" üzrə Azərbaycan Qran-prisini izləmək üçün Bakı trekində olan pilot əməkdaşımızla söhbətində karyerası ilə bağlı maraqlı məqamlara toxunub.

G.Abdullayev qeyd edib ki, hazırda məşqlərə fərdi şəkildə davam edir:

"Hesab edirəm ki, nə vaxtsa bir dəstək çıxsa, hazırlıqlı olum. Avtoidmanı sevirəm və hələ də elə bilirəm ki, yarımçıq, tamamlanmamış bir işim qalıb".

1997-ci ildə Bakıda doğulduğunu bildirən G.Abdullayev karyerasına 2006-cı ildə kartinq seriyasından başladığını və ilk dəfə Türkiyə çempionatında çıxış etdiyini deyib:

"Türkiyədə davamlı uğurlu çıxışım və çempionluğumdan sonra Azərbaycan Gənclər və İdman Nazirliyinin, eyni zamanda Bakı Şəhər Halqası Əməliyyat Şirkətinin dəstəyi ilə "Formula" seriyalarına yüksələ bildim. 2016-17-ci illərdə "Formula-3", həmin illərdə eyni zamanda BƏƏ-də keçirilən "Formula Gulf" seriyasında, daha sonra 2018-ci ildə "Formula-4" seriyasında çıxış etdim. Hər üç seriyada fərqli nailiyyətlərim oldu".

Azərbaycanlı pilot vurğulayıb ki, səkkiz yaşından başladığı karyerasına hazırda davam edə bilmir, çünki maliyyə baxımından dəstək tapmaq çox çətindir:

"Uşaq yaşlarımdan atamla "Formula-1" yarışlarına baxa-baxa kartinqə həvəsim yarandı. Bundan sonra atam məni özümü yoxlamaq üçün kartinq mərkəzinə gətirdi. O zaman Azərbaycanda kartinq yarışları olmadığından atam qonşu ölkələrdə iştirak etməyim üçün çempionatlar axtarırdı. Həmin illərdə "Formula-1" yarışları artıq ikinci dəfə Türkiyədə keçirilirdi. Ona görə avtoidmana maraq da çox idi. Böyük bir şirkətin sponsorluğu altında kartinq çempionatı keçirilirdi və mən də bu çempionatın ilk mərhələsinə qatıldım. Yarışlarda beş ən yaxşı pilot kateqoriyasına qədər yüksəldim. Bundan sonra karyeram başladı".

Telegramda izləyin