Feyk profildən insanları təhqir edənləri necə tapıb cəzalandırmaq olar?

Sosial şəbəkələrdə feyk hesabla insanları təhqir edən, şərəf və ləyaqətini alçaldan insanların sayı artıb. Hesab feyk olduğuna görə kimliyinin gizli qalacağından əmin olan bu şəxslər daha da arxayın olurlar. Bəs təhqir olunmuş şəxs feyk hesabın sahibinə qarşı necə qanuni tədbirlər görə bilər?

Vəkil Hüseyn İsmayılov Sonxeber.az-a bildirib ki, təhqir olunan şəxs əvvəlcə polisə feyk hesabın sahibini tapmaq üçün müraciət etməlidir. Polis hesabın sahibini müəyyən etdikdən sonra təhqir olunduğunu iddia edən şəxs məhkəmədə iddiaçı olaraq həmin şəxsi cavabdeh göstərməlidir.

"Təhqir olunduğunu iddia edən şəxs məhkəməyə müraciət edə bilər. Amma kimi cavabdeh göstərəcək? Əvvəlcə feyk hesabın sahibini tapmaq lazımdır. Məhkəmədə iddiaçı cavabdeh qoymalıdır.Cavabdehi müəyyən etmək iddiaçının üzərinə düşür. Bu, xüsusi ittiham qaydasında olduğuna görə özünü təhqir olnumuş hesab edən şəxs feyk profilin kim olduğunu tapmalıdır. Polis vasitəsi ilə də tapa bilər, özü də tapa bilər. Sonra məhkəməyə müraciət etmək olar. Polis şikayət əsasında feyk hesabın sahibini araşdıra bilər. Daxili İşlər Nazirliyinin kibertəhlükəsizliklə bağlı ayrıca şöbəsi var. Onlar araşdırıb tapa bilir" ,- deyə vəkil qeyd edib.

Qeyd edək ki, Maddə 148-1-də (İnternet informasiya ehtiyatında saxta istifadəçi adlar, profil və ya hesablardan istifadə edərək kütləvi nümayiş etdirməklə böhtan atma və ya təhqir etmə) sanksiyalar hazırda 1000 manatdan 2000 manatadək miqdarda cərimə və ya 360 saatdan 480 saatadək müddətə ictimai işlər və ya 2 ilədək islah işləri və ya 1 ilədək müddətə azadlıqdan məhrum etmə cəzalarından ibarətdir.

Şəbnəm Lətifi

Telegramda izləyin