"Azərbaycan xalqı var olduqca ulu öndər Heydər Əliyev ürəklərdə yaşayacaq" - DEPUTAT

"Ulu öndər Heydər Əliyev ömrünü vətəninə və xalqına həsr edən dahi şəxsiyyətdir".

Bunu Sonxeber.az-a danışan Cavanşir Paşazadə bildirib.

Deputat qeyd edib ki, ümummilli lideri Heydər Əliyev Azərbaycanın və müasir dünya tarixinə parlaq iz qoymuş dahi şəxsiyyət, müdrik dövlət xadimi kimi düşüb:

"Heydər Əliyevin həyat yolu və zəngin irsi hər bir azərbaycanlı üçün ibrət məktəbidir. Ümummilli lider Heydər Əliyevin anadan olmasının 100 illik yubileyi ölkəmizin hər yerində, eləcə müxtəlif ölkələrdə böyük ehtiram və dərin minnətdarlıq hissi ilə geniş qeyd olunur. Bundan sonra da Azərbaycan xalqı var olduqca ulu öndər Heydər Əliyev ürəklərdə yaşayacaqdır. Ümummilli lider Heydər Əliyevin keçdiyi şərəfli həyat yolu və müstəqil Azərbaycan naminə göstərdiyi xidmətlər gələcək nəsillər tərəfindən daim dərin ehtiramla yad ediləcək".

Deputat vurğulayıb ki, Heydər Əliyevin Azərbaycana rəhbərlik etdiyi o illərdə bugünkü dövlət müstəqilliyimizin möhkəm təməli qoyuldu:

"Ulu öndər Heydər Əliyev özünün və ailəsinin həyatını təhlükəyə ataraq Azərbaycana geri qayıtmasaydı bəlkə də dövlətimiz yenidən hansısa ölkənin müstəmləkəsinə çevrilmişdi. Heydər Əliyevin əsasını qoyduğu müdrik daxili və xarici siyasəti nəticəsində bu gün Azərbaycan regionda öz sözünü deyən güclü dövlətdir. Ən önəmlisi isə ulu öndər Heydər Əliyev dövlət rəhbəri kimi daxili hərbi-siyasi sabitliyin, vətəndaş həmrəyliyinin və xalqın birliyinin əldə edilməsinə də nail oldu.

Bu gün cənab prezident İlham Əliyev hər bir sahədə ulu öndər Heydər Əliyevin əsasını qoyduğu müdrik siyasəti uğurla davam etdirir. Xüsusilə də ordu quruculuğu sahəsində. Məhz buna görə də Azərbaycan 30 illik işğala öz gücü ilə son qoyaraq ərazi bütövlüyümüzü bərpa etdi. Kaş ki, ulu öndər Heydər Əliyev də bugünkü qürurverici və sevincli anları bizimlə birgə yaşayardı. Əminəm ki, dahi şəxsiyyət Heydər Əliyev həyatda olsaydı ata kimi oğlu, cənab prezident İlham Əliyevlə qürur duyardı".

Aysel Yusifqızı

Telegramda izləyin