Mehman Xəlilova ehtiyatsızlıqdan ya qəsdən adam öldürmə maddəsi ilə cəza veriləcək?

Mehman Xəlilov keçirdiyi sambo məşqləri zamanı 2016-cı il təvəllüdlü Fərid Bakarovun ağır xəsarət alaraq həyatını itirməsinə görə saxlanılıb. Mehman Xəlilova qəsdən adam öldürmə ya ehtiyatsızlıqdan adam öldürmə maddəsi ilə cəza verilə bilər?

Hüquqşünas Şamil Paşayev Sonxeber.az-a bildirib ki, Mehman Xəlilov qəsdən sağlamlığa zərər vurma , ehtiyatsızlıqdan zərər çəkmiş şəxsin ölümünə səbəb olma maddəsi ilə 9 ildən 12 ilə qədər müddətə azadlıqdan məhrum etmə ilə cəzalandırıla bilər. Amma həmin maddə gələcəkdə Cinayət Məcəlləsinin 120-ci maddəsinə, yəni qəsdən adam öldürmə maddəsinə tövsif edilə bilər.

"Hazırda hüquq mühafizə orqanlarının yaydığı məlumatda Azərbaycan Respublikasının Cinayət Məcəlləsinin 126.3-cü maddəsi ilə, yəni qəsdən sağlamlığa zərər vurma , ehtiyatsızlıqdan zərər çəkmiş şəxsin ölümünə səbəb olduqda 9 ildən 12 ilə qədər müddətə azadlıqdan məhrum etmə ilə cəzalandırılır. Amma həmin maddə gələcəkdə Cinayət Məcəlləsinin 120-ci maddəsinə, yəni qəsdən adam öldürmə maddəsinə tövsif edilə bilər. Burada təqsirkarı niyyəti önəmli faktordur. Nəzərə almaq lazımdır ki, qəsdən adam öldürmə iki yolla, dolayı və birbaşa qəsdlə həyata keçirilir. Dolayı qəsd odur ki, şəxs etdiyi əməlin ictimai təhlükəli olduğunu dərk edir, nəticələrini qabaqcadan görür, ancaq nəticəni arzu etmir. Bu da qəsdən adam öldürmə kimi tövsif olunur. Əməlin Cinayət Məcəlləsinin 120-ci maddəsində tövsifi ola bilər. İstintaqın nəticəsində bu mümkündür. Belə olan halda qəsdən adam öldürmə 9 ildən 14 ilə qədər, əgər ağırlaşdırıcı hallar müşahidə olunsa, 120.2-ci maddə ilə 14 ildən 20 ilə qədər və ya ömürlük azadlıqdan məhrum etmə cəzası verilə bilər", - deyə hüquqşünas vurğulayıb.

Qeyd edək ki, Aprelin 29-da Sumqayıtda Uşaq Şəhər xəstəxanasında 7 yaşlı Fərid Bakarovun ölüm xəbəri ölkədə əks-səda verib. Hadisənin baş verdiyi yer Sumqayıt Şəhər 1 nömrəli İxtisaslaşdırılmış Olimpiya Ehtiyatları Uşaq-Gənclər İdman-Şahmat Məktəbinə (İOEUGİŞM) tabedir.

Şəbnəm Lətifi

Telegramda izləyin