"Hər bir əməliyyat ehtimal olunan konkret hansısa cinayət hadisəsinin qarşısının alınması deməkdir" - DEPUTAT

"Dövlət Təhlükəsizlik Xidmətinin keçirdiyi əməliyyat nəticəsində xarici xüsusi xidmət orqanları ilə əməkdaşlıq edən Azərbaycan vətəndaşlarının ifşası cəmiyyətimiz tərəfindən son dərəcə müsbət qarşılanır".

Bunu Sonxeber.az-a danışan deputat Nəsib Məhəməliyev bildirib.

Deputat qeyd edib ki, DTX əməkdaşlarını uğurlu əməliyyatlar münasibətilə təbrik edir və xalqımızın təhlükəsizliyinin qorunması istiqamətində gördükləri vacib işlərdə müvəffəqiyyətlər arzulayıram:

"Son zamanlar hüquq mühafizə orqanlarımızın səyi nəticəsində Azərbaycana dost olmayan xarici dövlətlərin agentura şəbəkəsinə sarsıdıcı zərbələr vuruldu. Hər bir əməliyyat ehtimal olunan konkret hansısa cinayət hadisəsinin qarşısının alınması deməkdir.
44 günlük Vətən müharibəsində Ali Baş Komandanın ətrafında milyonlarla insanımız yumruq kimi birləşdi. Üç minə yaxın gəncimiz Vətən uğrunda şəhid oldu. Allah hər birisinə rəhmət eləsin. Minlərlə qazimiz var. Biz gənclərimizlə, xalqımızla fəxr edirik. Ermənilərin xalqımıza qarşı törətdiyi cinayətlərdən və vəhşiliklərdən sonra düşmən dəyirmanına su tökmək ən böyük xəyanətdir".

Deputat vurğulayıb ki, milli təhlükəsizlik hər birimiz üçün ən vacib məsələ olmalıdır:

"Burada qohum-əqrəba, dost-tanış, hətta ən yaxın ailə üzvlərindən belə söhbət gedə bilməz. Əgər, kimsə, hansısa maddi maraq və yaxud digər səbəblərdən xarici ölkələrin xüsusi xidmət orqanlarının təsir dairəsinə düşürsə, öz ölkəsi əleyhinə xidmət göstərirsə, deməli həmin ailənin tərbiyəsində, əxlaqında boşluqlar var. Belə insanlar ifşa olunmalı, cəmiyyət tərəfində ciddi qınaq obyektinə çevrilməlidir. Uşaqdan böyüyə, kimliyindən asılı olmayaraq, hər birimiz üçün vətən anlayışı, ölkənin bütövlüyü, toxunulmazlığı müqəddəs varlıq kimi təbliğ olunmalı, gələcək nəsillərə ötürülməlidir".

Aysel Yusifqızı

Telegramda izləyin