Ermənistan və Rusiya iqtisadiyyat nazirləri əməkdaşlığı müzakirə ediblər

Ermənistanda Avrasiya Hökumətlərarası Şurasının sessiyası çərçivəsində Ermənistan və Rusiyanın işgüzar dairələrinin nümayəndələrinin görüşü keçirilib.

Sonxeber.az xəbər verir ki, bu barədə erməni mətbuatı məlumat yayıb.

Tədbirdə Ermənistanın İqtisadiyyat naziri Vahan Kerobyan və Rusiyanın iqtisadi inkişaf naziri Maksim Reşetnikov iştirak edib və əməkdaşlığı müzakirə ediblər.

Kerobyan bildirib ki, o, rusiyalı həmkarı ilə investisiyalar, birgə layihələr və logistika ilə bağlı bir sıra məsələləri müzakirə edib.

Reşetnikov bildirib ki, nahar zamanı makroiqtisadiyyat və ölkənin iqtisadi siyasəti ilə bağlı məsələlər qaldırılıb.

Rusiyalı nazir deyib ki, rublun dram qarşısında "dramatik" ucuzlaşması Rusiyaya mal ixrac edən erməni iş adamlarında müəyyən narahatlıq yaradıb.

"Bu, mövcud vəziyyətdir və strateji vəzifələri ləğv etmir. Strateji vəzifələr qarşılıqlı sərmayələr, yeni layihələr və əməkdaşlıqlardır", - deyə rusiyalı nazir bildirib.

O, Ermənistanla Rusiya arasında intensiv ticarət dövriyyəsindən də danışıb, prosesdə bəzi məsələlərin ortaya çıxdığını və müvafiq dövlət qurumları tərəfindən həllini tələb etdiyini bildirib.

Reşetnikov Kerobyanla bütün məsələlərə nəzarət etmək, bizneslərə hərtərəfli izahatlar vermək və lazım gəldikdə müəyyən düzəlişlər etmək barədə razılığa gəldiyini bildirib.

O, biznes ictimaiyyəti ilə görüşün çox maraqlı və vacib olduğunu bildirib, çünki iki ölkə arasında əlaqələr, ticarət və birgə investisiyalar artır.

Telegramda izləyin