Qonşu ölkədə qadın vəba xəstəliyindən öldü: 200 nəfər nəzarətə götürüldü

Rusiyanın İrkutsk vilayətində 28 yaşlı qadın taun xəstəliyindən vəfat edib. İnfeksiya təsdiqləndikdən sonra onunla təmasda ola biləcək təxminən 200 nəfər tibbi nəzarətə götürülüb.

Lent.az xarici KİV-ə istinadla bildirir ki, qadın oktyabrın 2-nə keçən gecə Şelexov rayon xəstəxanasında dünyasını dəyişib. Onun məhz taun xəstəliyinə yoluxduğu qonşu Buryatiyanın rəhbəri Aleksey Tsıdenov tərəfindən də təsdiqlənib.

İnfeksiya müəyyən edildikdən sonra xəstəxanada karantin rejimi tətbiq olunub. Bəzi şöbələrdə hələ oktyabrın 1-dən etibarən xəstələrin qəbulu və evə buraxılması dayandırılıb.

Ümumilikdə 197 nəfər təmasda olan şəxs kimi tibbi nəzarətə götürülüb. Onlardan 189-u xəstəxanalara yerləşdirilib, 12 nəfər isə taun əleyhinə ixtisaslaşmış instituta göndərilib. Regional hakimiyyətin məlumatına görə, həmin şəxslərdə infeksiya əlamətləri aşkarlanmayıb, ilkin laborator analizlərin nəticələri də mənfidir.

Qadının iş yerində yoluxmuş ola biləcəyi ilə bağlı versiya da yayılıb. Yerli KİV-in məlumatına görə, o, taun əleyhinə müəssisədə laborant işləyib və onun sentyabrın 25-də ağciyər taununun törədicisi olan nümunə saxlanılan sınaq şüşəsini sındırdığı iddia olunur. Lakin bu məlumat rəsmi şəkildə təsdiqlənməyib.

Buryatiya rəsmiləri qadının respublikaya səfər zamanı yoluxması barədə yayılan məlumatları təkzib ediblər. Aleksey Tsıdenov bildirib ki, qadın Buryatiyaya gəlməyib və yoluxma halının bu regionla əlaqəsi yoxdur.

Eyni zamanda Baykalsk administrasiyası sakinlərə müvəqqəti olaraq Şelexov və yaxınlıqdakı şəhərlərə səfərlərdən çəkinməyi tövsiyə edib. Bütün hallar aydınlaşdırılanadək gediş-gəlişin məhdudlaşdırılması məsləhət görülüb.

Ağciyər taunu Yersinia pestis bakteriyasının törətdiyi taun xəstəliyinin üç əsas formasından biridir. Bu zaman infeksiya ağciyərləri zədələyir. Əsas simptomlar yüksək hərarət, baş ağrısı, təngnəfəslik, sinə ağrısı, öskürək və bəzi hallarda qanlı bəlğəmdir.

Ağciyər taunu yoluxmuş insan və ya heyvandan hava-damcı yolu ilə keçə bilər. Xəstəlik digər taun formalarının ağırlaşması nəticəsində infeksiyanın ağciyərlərə yayılması ilə də inkişaf edə bilər.

Müalicə olunmadıqda ağciyər taunu çox yüksək ölüm riski daşıyır.

Telegramda izləyin