"Fransa Azərbaycana dərs keçə bilməz" - ŞƏRH

Sentyabrın 24-də Fransa Prezidenti Emmanuel Makron Fransanın TF1 və France 2 kanallarına müsahibəsi zamanı növbəti dəfə bölgədə mövcud vəziyyəti təhrif edən mövqe sərgiləməsi onun tərəfindən tətbiq edilən ikili standartların və qərəzin bariz nümunəsidir.

"Azərbaycan uzun müddətdir Ermənistan tərəfinin təxribatlarını sülh yolu ilə həll etməyə çalışıb. Qarabağda qeyri-qanuni silahlı erməni varlığına son qoymaq və konstitusiya quruluşunu bərpa etmək məqsədilə Azərbaycan antiterror əməliyyatlarını uğurla həyata keçirdi. Bununla belə, həm Ermənistan, həm də onun himayədarı olan Fransa beynəlxalq ictimaiyyətdə əsassız rəy yaratmaqda davam edir. Bunu biz Fransa prezidenti Emmanuel Makronun fransız kanallarına verdiyi müsahibəsində açıqladığı məqamlar ilə görə bilərik. Fransa prezidenti Emmanuel Makron müsahibəsində Azərbaycanın Ermənistana qarşı mümkün hücumundan narahat olduğunu bildirib. Eyni zamanda Bakının bu ölkənin ümumi sərhədini və ərazi bütövlüyünü təhdid etdiyini deyib. Moskva və Ankaranı, eləcə də Bakını ittiham edən Makron, "Bu gün Azərbaycanla şərik olan Rusiya, bu manevrləri hər zaman dəstəkləyən Türkiyə və sərhəd tanımayan, Ermənistanın sərhədlərini təhdid edən (Azərbaycan) hökuməti var" deyib.Emmanuel Makron və komandası gündəmə gəlmək üçün verdikləri açıqlamalar birmənalı olaraq beynəlxalq hüququn prinsiplərinə qarşıdır. Fransa Prezidentinin Azərbaycanın Qarabağdakı antiterror tədbirlərinin nəticələri zamanı olan bəyanatı diqqət çəkir. Fransa Azərbaycana dərs keçə bilməz".

Bu sözləri Sonxeber.az-a Milli Məclisin deputatı Bəhruz Məhərrəmov deyib.

O bildirib ki, Fransa elə zənn edir ki, Ermənistanı dəstəkləyib yanında olmaqla Cənubi Qafqazda özünə yer edəcək.

"Azərbaycan istər Vətən müharibəsində və son 3 ildə həyata keçirilən cəza tədbirlərində, istərsə də 23 saatlıq antiterror tədbirlərində beynəlxalq hüququn prinsiplərini, BMT Nizamnaməsini, o cümlədən beynəlxalq humanitar hüququ rəhbər tutaraq hərəkət edib. Azərbaycan Prezidenti dəfələrlə rəsmən bəyan edib ki, bizim hər hansı dövlətə, o cümlədən Ermənistana ərazi iddiamız yoxdur. Ermənistan və Azərbaycan ötən ilin oktyabrında və bu ilin mayında qarşılıqlı olaraq bir-birinin ərazi bütövlüyünü tanıyıb. Vətən müharibəsindən sonra Azərbaycan davamlı şəkildə sülh ritorikasına üstünlük verir. Delimitasiya, demarkasiya prosesində faktiki olaraq yeganə israrlı tərəf Azərbaycan olub. Eyni zamanda, biz antiterror tədbirlərini özümüzün beynəlxalq hüquqla tanınan ərazilərimizdə həyata keçirmişik. Azərbaycan Qarabağın erməni əsilli sakinlərinə ən yüksək səviyyədə siyasi, hüquqi və təhlükəsizlik təminatı verib".

Deputat qeyd edib ki, belə olan halda Azərbaycanın antierməni mövqeyində, habelə mümkün eskalasiya məqsədi güdməsində təqsirləndirilməsi yolverilməzdir:

"Hətta Ermənistan belə bu fikirlərdə xüsusi ehtiyatla davrandığı bir şəraitdə Fransanın fəallıq göstərərək özünü erməni dövlətinin hamisi kimi aparması qəbuledilməzdir. 30 il ərzində regionda münasibətləri gərginləşdirməyə xidmət edən Fransa bu gün regionda yenidən fəallaşmaq cəhdləri ilə regiona, ələxsus Ermənistanın özünə müsbət heç nə vəd etmir".
AYSEL ƏKBƏR

Telegramda izləyin