Bakıda da tramvay xəttinin inşası aparıla bilərmi?

Bakının bir sıra küçə və prospektlərində günün istənilən saatında nəqliyyatın hərəkətində sıxlıq müşahidə edilir.

Bu artıq sakinlərin gündəlik qarşılaşdıqları problemdən çox, vərdiş etdiyi bir hal olub. Sanki belə də olmalıdır. Həftəsonları, bayram günləri və məktəb tətilləri zamanı yolları nisbətən boş görəndə insan gözlərinə inanmır...

Uzun sözün qısası, əhalinin sayı artdıqca paytaxtda nəqliyyatın yükü də ağırlaşır. Bir neçə il öncəyə qədər yerüstü nəqliyyatın yükünü yeraltı nəqliyyat azalda bilirdisə, bu gün bunu demək çətindir. Artıq yeraltı nəqliyyatın da yükünün azalması üçün alternativ sərnişindaşımalara ehtiyac yaranıb.

Sərnişinlər arasında aparılan kiçik sorğu zamanı çoxu tramvay xəttinin fəaliyyətinin bərpasının daha rahat ola biləcəyini deyib.

Sonxeber.az-a açıqlamasında nəqliyyat sahəsi üzrə ekspert Aslan Əsədov bildirib ki, bu, tıxacların azalmasına əhəmiyyətli dərəcədə təsir edə bilər:

"Bu, çox yerində verilən qərardır. Düşünürəm ki, Naxçıvanda bunu layihələndirib inşa işlərinə başladıldıqdan sonra Bakıda da tətbiqinə başlanılacaq. Bu da tıxacların azalmasına əhəmiyyətli dərəcədə təsir edəcək. Gələcəkdə isə respublikanın böyük şəhərlərində bu xətlərin çəkilməsi məqsədəuyğun olar. Xüsusilə ekoloji cəhətdən bu yaxşı olardı. Böyük şəhərlərdə - Sumqayıt, Gəncə, Mingəçevir, Şirvan, hətta Şuşa şəhərində və işğaldan azad edilən digər şəhərlərimizdə də tramvay xətlərini inşa etmək mümkündür".
AYSEL ƏKBƏR

Telegramda izləyin