"Azərbaycanda gömrük tarif dərəcələrində artımlar baş vermir" - Şahin Bağırov

Azərbaycanda gömrük tarif dərəcərlərində artımlar baş vermir.

Sonxeber.az xəbər verir ki, bunu Dövlət Gömrük Komitəsinin (DGK) sədri Şahin Bağırov Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında 2024-cü ilin dövlət büdcəsinin proqnozlarının müzakirəsi zamanı deyib.

"Əksinə ölkədə aparılan iqtisadi siyasət ondan ibarətdir ki, tarif dərəcələrində azaldılma tendensiyası baş verir. Bu da istehsal sahələrində əlavə dəyərin yaradılması və xidmət sahələrinə dəstək göstərmək üçün həyata keçirilir. Bu konteksdə gömrük orqanları növbəti il üçün 5 milyard 900 milyon manatlıq büdcə daxilolmalarını təmin edilməsinə çalışılacaq. Bu hesablamalar idxal həcmlərindən asılı olaraq baş verir".

DGK sədri əlavə edib ki, eyni zamanda gömrük dəyərinin müəyyən edilməsi məsələlərində də Komitənin üzərinə mühüm işlər düşür: "Bu baxımdan idxal həcmlərini nəzərə almaqla büdcə daxilolmalarının təmin edilməsindən ötrü gömrük dəyərləndirilməsinin düzgün həyata keçirilməsi baş verməlidir. Bu baxımdan hazırda Azəbaycanda gömrük xidmətində gömrük dəyərləndirməsi Ümumdünya Ticarət Təşkilatının normalarına uyğun olaraq metodika əsasında müəyyən edilib və bu sistem əsasında düzgün idarəetmə və ölkəmizə daxil olan yüklərin düzgün dəyərinin müəyyən edilməsi nəticəsində daxilolmaların təmin olunması üçün zəruri işləri görəcəyik. Növbəti ildə fəaliyyətimiz nəticəsində büdcə daxilolmaları təmin ediləcək".

Telegramda izləyin