"Ana televiziyamız müharibə dövründə informasiya savaşında ön cəbhədə yer tutdu" - DEPUTAT

Azərbaycanda hər il noyabrın 6-sı radio və televiziya işçilərinin peşə bayramı günü kimi qeyd olunur. Bu gün Azərbaycan televiziyasının 67, radiosunun isə 97 yaşı tamam olur.

Bakı Televiziya Studiyası ilk dəfə 1956-cı il fevralın 14-də efirə çıxıb. İlk veriliş günündə ekranda Nəcibə Məlikova görünüb və çıxışına "Göstərir Bakı" kəlməsi ilə başlayıb. Həmin gün ekranda "Bəxtiyar" bədii filmi göstərilib.

"İnformasiya mühitimizdə hər bir teleradio şirkətinin öz yeri var, amma ölkənin ən qocaman televiziya və radio qurumu, Azərbaycan teleradio mühitinin şəksiz lideri, informasiya savaşında ağır artileriyamız, milli mənəvi dəyərlərimizin qorunması, mədəniyyətin, incəsənətin, ədəbiyyatının tanıdılması və təbliği istiqamətində müstəsna rol oynayan unikal institutumuz olan "Azərbaycan Televiziya və Radio Verilişləri" QSC yalnız xəbər istehsalçısı deyil, həm də milli məfkurə, dil, tarix, mənəviyyat məsələri ilə bağlı dövlət siyasətinin realizə olunmasında əvəzsiz roluna görə heç bir media qurumla nəinki rəqabət aparmır, əksinə ölkə teleradio mühiti üçün yol və cığır açır".

Bu sözləri Sonxeber.az-a Milli Məclisin deputatı Bəhruz Məhərrəmov deyib.

O bildirib ki, bu gün ana televiziyamız sözün əsl mənasında günün tələbləri ilə ayaqlaşır, dəyişir, inkişaf edir. Son illərədək AZTV -yə yalnız rəsmi informasiyaları üçün üz tutan auditoriya bu gün artıq Azərbaycan Televiziyasına həm də ən operativ informasiya mənbəyi kimi baxır.

"AZTV-nin Vətən müharibəsi və Antiterror tədbirləri dönəmində fəaliyyəti isə ayrıca tədqiqat mövzusu olmalıdır. Ana televiziyamız müharibə boyu Müzəffər Ali Baş Komandanın əsas yardımçılarından biri kimi informasiya savaşında ön cəbhədə yer tutdu. Müharibənin ən qaynar nöqtələrindən AZTV əməkdaşlarının səsini eşidib, ən azı telefon çəkilişi ilə olsa da tamaşaçıya anında hadisə yerindən vizual informasiya təmin olundu. Bu yolda verdiyi qurbanlar milli televiziyamızın əzmini qıra bilmədi, əksinə, döyüş ruhunu gücləndirdi, müharibə cinayətləri, o cümlədən, ermənilərin Tərtər, Bərdə və Gəncədə mülki sakinlərə qarşı törətdiyi vəhşiliklərin ifşa olunmasında dövlət televiziyası unikal operativlik nümunəsi ortaya qoydu. Bu gün, postmüharibə reallığında isə Zəfərimizin nəticələrinin davamlılığının təmin olunması üçün Azərbaycan Televiziyası işğaldan azad olunmuş ərazilərimizdə Müzəffər Prezidentimizin izi ilə qarış-qarış gəzərək dövlətimizin diqtə etdiyi yeni situasiyanı dünyaya car çəkməklə, milli həmrəyliyimizin möhkəmləndirilməsinə yönəli təbliğatla, azərbaycançılıq məfkurəsini, cənab İlham Əliyevin milli maraqların təmininə yönələn alternativsiz siyasi kursunu rəhbər tutaraq informasiya sərhədlərimizin əsas qoruyucularından biri kimi şərəflə xidmətini davam etməkdədir.
Teleradio işçilərinin peşə bayramında AZTV başda olmaqla bu sferada bütün milli ruha və peşəkar əqidəyə sadiq qalan bütün teleradio kollektivlərini təbrik edir, daha güclü Azərbaycan naminə fəaliyyətlərində uğurlar arzulayırıq".
AYSEL ƏKBƏR

Telegramda izləyin