"Hərbiçilərimizin əsirlikdən azad edilməsi cənab prezident İlham Əliyevin siyasi iradəsini və gücünü bir daha sübut etdi" - DEPUTAT

Xəbər verdiyimiz kimi Azərbaycan Respublikası Prezidentinin Administrasiyası və Ermənistan Respublikası Baş nazirinin Aparatı arasında aparılmış danışıqlar nəticəsində humanizm prinsipinə sadiqlik ruhunda, xoş niyyət göstəricisi olaraq iki ölkə arasında qarşılıqlı etimad tədbiri kimi Azərbaycan tərəfindən erməni əsilli 32 şəxsin, Ermənistan tərəfindən isə iki Azərbaycan hərbçisinin azad edilməsi barədə razılıq əldə edilib.

Bununla bağlı Sonxeber.az-a danışan deputat Cavanşir Paşazadə bildirib ki, əsirlikdə olan iki hərbçimizin azad edilməsi cənab prezident İlham Əliyevin siyasi iradəsini və gücünü bir daha sübut etdi:

"Ali Baş Komandan İlham Əliyev nəyi, necə və nə vaxt edəcəyini yaxşı bilir. Bu gün danışıqlar masasında yalnız Azərbaycan dövlətinin şərtləri müzakirə edilir. Əlbəttə, biz buna cənab prezident İlham Əliyevin dəmir iradəsinin və yüksək diplomatik qabiliyyətinin nəticəsində nail olmuşuq".

Deputat vurğulayıb ki, Naxçıvan istiqamətində yolu azaraq Ermənistana keçən iki hərbiçimiz, Hüseyn Axundov və Aqşin Bəbirovun əsirlikdən azad edilməsi cənab prezident İlham Əliyevin vətəndaşına verdiyi dəyərin göstəricisidir:

"Bilirsiniz ki, ölkə rəhbərliyi heç bir zaman vətəndaşını darda qoymayıb. Biz bunun artıq bir neçə dəfə şahidi olmuşuq. Mən də özlüyümdə növbəti dəfə bizə bu gözəl qələbəni və sevinci yaşadan cənab prezident İlham Əliyevə təşəkkür edir, azad olunan hərbiçilərimizin ailələrinə gözaydınlığı verirəm".

Telegramda izləyin